Монголын Хуульчдын холбооны 2025 оны хуульчийн мэргэжлийн шалгалтад 1211 эрх зүйч бүртгүүлж оролцсоноос 100 эрх зүйч шалгалтад тэнцсэн. Үүнээс холбооны Ерөнхийлөгчийн 2025 оны арванхоёрдугаар сарын 02-ны өдрийн тушаалаар гишүүнээр элсүүлсэн 81 хуульчийн тангараг өргөх ёслолын ажиллагааг өчигдөр зохион байгууллаа.

Тангараг өргөх ёслолын ажиллагааг Монголын Хуульчдын холбооны Тамгын газрын дарга Ш.Жолбарс удирдан чиглүүлсэн бөгөөд Монголын Хуульчдын холбооны Ерөнхийлөгч П.Одгэрэл, Монголын Хуульчдын холбооны Ерөнхийлөгч асан Б.Гүнбилэг, Шүүгчдийн хорооны тэргүүн, Иргэний хэргийн давж заалдах шатны шүүхийн шүүгч С.Энхбаяр,  Зөвлөлийн гишүүн, Нийслэл дэх Захиргааны хэргийн анхан шатны шүүхийн Ерөнхий шүүгч Т.Мөнх-Эрдэнэ, Зөвлөлийн гишүүн Ц.Мөнхбат, Э.Ганхөлөг, Ч.Баянжаргал, Г.Урангоо нар оролцож, шинэ хуульчдад мэргэжлийн үйл ажиллагаа эрхлэх зөвшөөрлийн гэрчилгээг гардуулж, баяр хүргэн, цаашдын ажилд нь амжилт хүслээ.