Монголын Хуульчдын холбооны Ерөнхийлөгч М.Мөнхбатыг өнөөдөр Шүүхийн Ерөнхий зөвлөлийн дарга П.Золзаяа хүлээн авч уулзлаа.

  Уулзалтын үеэр Монголын Хуульчдын холбооны Ерөнхийлөгч М.Мөнхбатын зүгээс хуульчдыг чадавхжуулах, мэргэжил, ёс зүйн болон хууль хэрэглээний нэгдмэл байдлыг бий болгох хүрээнд хамтарсан сургалт зохион байгуулах, хиймэл оюун ухааныг хэрэглээний түвшинд нэвтрүүлэх чиглэлээр Фулбрайтын хөтөлбөрийг хамтран хэрэгжүүлэх хүсэлтэй байгаа уламжилсан.    

    Шүүхийн ерөнхий зөвлөлийн дарга П.Золзаяа Шүүгчийг сонгон шалгаруулах журамд өөрчлөлт оруулж байгаа бөгөөд журмын төсөл болон сонгон шалгаруулалтын үнэлгээнд шинжээчийг хэрхэн оролцуулах талаар Монголын Хуульчдын холбооноос санал авах, хамтарч ажиллах чиглэлүүдийн хүрээнд ажлын хэсэг байгуулах саналтай байгаагаа илэрхийлсэн юм.

  Энэ удаагийн уулзалтаар талууд хууль хэрэглээний нэгдмэл байдлыг хангах хүрээнд шүүгч, прокурор, өмгөөлөгч, хуульч нарын сургалтыг уялдуулах, сургалтын хөтөлбөрүүдийг нарийвчлах, шүүхийн захиргааны ажилтнуудыг чадавхжуулах, оюутнуудыг шүүхэд дадлага хийлгэж, шүүхийн хөтчөөр ажиллуулах, хиймэл оюун ухааныг хэрэглээний түвшинд нэвтрүүлэх зэрэг асуудлаар санал солилцсон бөгөөд цаашид харилцан ойлголцлын санамж бичиг байгуулж, хамтран ажиллахаар тохиролцлоо.   

    Уулзалтад Шүүхийн Ерөнхий зөвлөлийн гишүүн Г.Даваадорж, С.Энхбаатар, Х.Эрдэм-Ундрах, Гүйцэтгэх нарийн бичгийн дарга Б.Эрдэнэтулга, Монголын Хуульчдын холбооны Тамгын газрын дарга Ш.Жолбарс, Гадаад харилцааны зөвлөх Ц.Одонжав болон холбогдох албаны төлөөлөл оролцсон юм.