Хууль зүй, дотоод хэргийн сайд Б.Энхбаяр өнөөдөр Монголын Хуульчдын холбооны Ерөнхийлөгч М.Мөнхбатыг хүлээн авч уулзлаа.

Уулзалтаар хууль зүйн салбарын шинэчлэл, эрх зүйн шинэтгэлийн хүрээнд мэргэжлийн холбоо ямар үүрэгтэй оролцох, энэ чиглэлээр Хууль зүй, дотоод хэргийн яамтай хэрхэн хамтран ажиллах талаар санал солилцлоо.

Түүнчлэн Хуульчийн эрх зүйн байдлын тухай хуулийн шинэчилсэн найруулгын төслийг боловсруулан, хэлэлцүүлэхэд Монголын Хуульчдын холбооноос онцгой ач холбогдол өгч, яамтай хамтран ажиллах хүсэлтэй байгаагаа илэрхийллээ.

Уулзалтын үеэр Хууль зүй, дотоод хэргийн сайд Б.Энхбаяр хууль зүйн салбарт хэрэгжүүлж буй хууль, эрх зүйн шинэчлэлийн бодлогоо танилцуулж, Монголын Хуульчдын холбоог Хуульчийн эрх зүйн байдлын тухай хуулийн төслийг боловсруулах болон хуулиас давж, иргэдийн Үндсэн хуульд заасан эрх, эрх чөлөөг хязгаарласан журмуудыг цэгцлэх ажилд хүч нэмж, хамтран ажиллаж, мэргэжлийн туслалцаа үзүүлэх нь чухал байгааг онцолсон.

Тус уулзалтад Монголын Хуульчдын холбооны Тамгын газрын дарга Ш.Жолбарс, Хууль зүйн сургуулийг магадлан итгэмжлэх хорооны дарга Х.Сэлэнгэ, Хуульчийн нийтэд тустай мэргэжлийн үйл ажиллагаа эрхэлсэн хорооны тэргүүн Ц.Одонжав нар болон холбогдох албаны төлөөлөл оролцсон.