Бүгд Найрамдах Хятад Ард Улс Арилжааны эвлэрүүлэн зуучлалын журам баталж, 2026 оны тавдугаар сарын 1-нээс хэрэгжүүлэхээр болжээ.
Шинээр батлагдсан тус журам нь арилжааны маргааныг үр дүнтэй шийдвэрлэх, оролцогч талуудын хууль ёсны эрх ашгийг хамгаалах, арилжааны эвлэрүүлэн зуучлалын салбарын хөгжлийг дэмжих, бизнесийн орчныг сайжруулах зорилготой ажээ.
Журамд худалдаа, хөрөнгө оруулалт, санхүү, тээвэр, үл хөдлөх хөрөнгө, барилга, оюуны өмч зэрэг салбар дахь маргаанд арилжааны эвлэрүүлэн зуучлалыг хэрэглэхээр тусгасан бол гэр бүл, өв залгамжлал, асран хамгаалалт, хөдөлмөр, хэрэглэгчийн эрх зэрэг зарим төрлийн маргаанд хэрэглэхгүй байхаар зохицуулсан байна. Мөн эвлэрүүлэн зуучлалын үйл ажиллагаанд баримтлах сайн дурын, хууль ёсны, шударга, нууцлалын зарчмыг тодорхойлж, зуучлагчийн төвийг сахисан байдал, ёс зүй, хариуцлагыг онцлон тусгажээ. Түүнчлэн талууд эвлэрүүлэн зуучлалын гэрээг шүүхээр баталгаажуулах боломжийг нээлттэй болгосон нь маргаан шийдвэрлэх механизмын үр нөлөөг нэмэгдүүлэх ач холбогдолтой гэж үзжээ.
Энэхүү журам нь БНХАУ-д арилжааны эвлэрүүлэн зуучлалын эрх зүйн орчныг боловсронгуй болгож, олон улсын түвшинд өрсөлдөх чадвартай салбар болгон хөгжүүлэхэд чухал алхам болж байна хэмээн Синьхуа агентлаг мэдээлжээ.
Эх сурвалж: www.gov.cn