Монголын Хуульчдын холбооны Тамгын газрын дарга Ш.Жолбарс Канад Улсын дээд шатны шүүхийн Шүүгчдийн холбооны гүйцэтгэх захирал Стефани Локхарт, Ньюфондлэнд, Лабрадор мужийн Давж заалдах шатны шүүхийн шүүгч Кэтрин О’Брайен нарыг 2026 оны 05 дугаар сарын 12-ны өдөр хүлээн авч уулзлаа.

Уулзалтаар Канадын Засгийн газрын санхүүжилттэйгээр хэрэгжиж буй “Тэгш эрх, шударга ёсыг хүн бүрд” төслийн хэрэгжилт, хамтын ажиллагааны чиглэл, цаашдын төлөвлөгөөний талаар санал солилцов. Мөн төслийн хүрээнд шүүх, хууль зүйн байгууллагуудын хамтын ажиллагааг өргөжүүлэх, олон нийтэд эрх зүйн боловсрол олгох, хүний эрхэд суурилсан шударга ёсны тогтолцоог бэхжүүлэх чиглэлээр хэрэгжүүлж буй үйл ажиллагааны талаар хэлэлцлээ. Тус төсөл нь Монгол Улсад шударга ёсны хүртээмжийг нэмэгдүүлэх, шүүхийн хараат бус байдал, ил тод байдлыг бэхжүүлэх, хуульч, шүүгчдийн мэргэжлийн чадавхыг дээшлүүлэх, эмэгтэйчүүд болон эмзэг бүлгийн иргэдийн эрх зүйн хамгаалалтыг сайжруулах зорилготой ажээ.

Уулзалтад Монголын Хуульчдын холбооны Олон улсын эрх зүйн хорооны Тэргүүн Э.Алимаа, ахлах мэргэжилтэн Ж.Бариаширсүрэн, “Тэгш эрх, шударга ёсыг хүн бүрд” төслийн Монгол дахь удирдагч С.Билгүүн, орчуулагч Н.Сэлэнгэ нар оролцлоо.