Монголын Хуульчдын холбооны Эвлэрүүлэн зуучлалыг дэмжих хорооноос гишүүдээ идэвхжүүлэх, хорооны үйл ажиллагааг таниулах зорилгоор нийт гишүүдийнхээ дунд нээлттэй өдөрлөгийг хоёр дахь жилдээ зохион байгууллаа.

Өдөрлөгийн нээлт, хаалтын үйл ажиллагаанд Монголын Хуульчдын холбооны Тамгын газрын дарга Ш.Жолбарс, Эвлэрүүлэн зуучлалыг дэмжих хорооны Тэргүүн Д.Түмэнжаргал нар оролцож, Монгол Улсад эвлэрүүлэн зуучлалыг хөгжүүлэхэд тус хорооны гишүүдийн идэвх оролцоо, санаачилга чухал байгааг онцолсон юм.

Өдөрлөгийн хүрээнд Улсын Их Хурлын гишүүн Х.Баасанжаргал Гэр бүлийн хэрэг шүүхэд хянан шийдвэрлэх тухай хуулийн төслийн талаар мэдээлэл өгсөн. Мөн Дэлхийн Эерэг сэтгэл заслын холбооны үндсэн сэтгэл засалч, танин мэдэхүйн зан үйлийн сэтгэл засалч, сэтгэл зүйч Б.Мөнгөнцэцэг “Сэтгэлзүйн эрүүл мэнд, практик сургалт” сэдвээр хичээл орсон. Түүнчлэн Монголын Хуульчдын холбооны гишүүн хуульч, сэтгэл зүйч Б.Ариунбуян “Ажлаас халшрах хам шинж” сэдвээр сонирхолтой мэдээлэл хуваалцсан юм.

Энэ удаагийн өдөрлөг мэдээлэл сайтай, гишүүдийн оролцоо ихтэй, ач холбогдолтой болсны зэрэгцээ гишүүдийн дунд хөгжөөнт тэмцээн зохион байгуулж, амралтын нэг өдрийг үр дүнтэй, зугаатай өнгөрүүлсэнд оролцогчид сэтгэл хангалуун байлаа.

Тус өдөрлөгийг зохион байгуулахад идэвх санаачилгатай ажилласан хорооны Удирдах зөвлөлийн гишүүд, Тамгын газрын мэргэжилтнүүд, өөрийн үнэт цагаа зориулан хүрэлцэн ирж мэдээлэл хуваалцсан сургагч багш нар болон хүрэлцэн ирсэн нийт оролцогчдодоо талархал илэрхийлж, ажлын амжилт хүсье.