Хуульчдын холбооны үйл ажиллагааг сурталчлах, хуульчийн үргэлжилсэн сургалт зохион байгуулах, үүргийн биелэлтийг хангуулах, тухайн орон нутгийн салбарын зохицуулагчийг сонгох, хуульчдын ажиллах орчин нөхцөлтэй танилцах зорилгоор тус холбооны Ерөнхийлөгч Б.Гүнбилэгээр ахлуулсан ажлын хэсэг 2016 оны 06 дугаар сарын 06-10-ны өдрүүдэд Булган, Орхон, Хөвсгөл аймгуудад ажиллахаар боллоо.
Ажлын хэсгийн үйл ажиллагааны ерөнхий хөтөлбөрт тусгагдсанаар Хуульчдын холбоог сурталчлах нээлттэй хаалганы өдөрлөг зохион байгуулах, Захиргааны ерөнхий хууль, Эрүүгийн хуулийн шинэчилсэн найруулга зэрэг шинээр батлагдсан хууль тогтоомжийн талаар сургалт явуулах, орон нутаг дахь холбооны салбар зохицуулагчийг сонгох сонгуулийг зохион байгуулах юм.
Иймд Булган, Орхон, Хөвсгөл аймагт мэргэжлийн үйл ажиллагаа явуулж буй хуульчид та бүхэн Хуульчдын холбооноос зохион байгуулж буй үйл ажиллагаанд идэвхтэй оролцоно уу. Хөтөлбөрийг ЭНД дарж харна уу!
Дашрамд дурдахад, Хуульчдын холбооны Тамгын газраас бусад аймгуудаар төлөвлөгөө гарган ажиллахаар бэлтгэж байна.
