Монгол Улсын Засгийн газраас 2016 оны улсын төсөвт тодотгол хийх хүрээнд төрийн албаны зардлыг хэмнэх зорилгоор Шүүгчийн эрх зүйн байдлын тухай хуульд өөрчлөлт оруулах тухай, Шүүхийн захиргааны тухай хуулийн зарим заалтыг хүчингүй болсонд тооцох тухай хуулийн төсөл, шүүгчдийн цалинг бууруулах тогтоолын төслийг УИХ-д өргөн бариад буй. Энэ асуудалтай холбоотойгоор 2016 оны 08 дугаар сарын 24-ний өдөр Шүүгчдийн хорооны Удирдах зөвлөлийн гишүүд Шүүхийн Ерөнхий зөвлөлийн удирдлагуудтай уулзалт зохион байгуулж, санал солилцлоо.

    Уулзалтад Шүүхийн Ерөнхий зөвлөлийн гишүүн Д.Эрдэнэчулуун, Гүйцэтгэх нарийн бичгийн дарга Т.Мэндсайхан, Шүүгчдийн хорооны Тэргүүн Ц.Оч, гишүүд Б.Батцэрэн, Т.Өсөхбаяр, Г.Даваадорж, Ц,Өрнөндэлгэр, хороо хариуцсан мэргэжилтэн П.Нарантуяа нар оролцлоо.

    Уулзалтаар жил бүрийн улсын төсөв батлах үед шүүгчийн цалинг хөндөж, УИХ-ын тогтоолоор өөрчлөн баталж  байгаа нь  Үндсэн хуулийн нэг гол амин сүнс болсон төрийн эрх мэдэл бүрийн бие даасан байдал, хяналт, тэнцвэрийн зарчим алдагдаж, шүүх эрх мэдлийн хараат бус байх зарчимд халдсан үйлдэл болж байгааг талууд дурьдав. Цаашид шүүгчийн цалин хөлсийг бууруулахгүй байх талаар шүүгчдийн мэргэжлийн холбоод болон Монголын Хуульчдын холбоо, Шүүхийн ерөнхий зөвлөлтэй нягт хамтран ажиллаж, шүүгч, хуульчдын дуу хоолойг хүргэх, шүүгчийн хуульд заасан эрх зүй, эдийн засгийн баталгааг хадгалж авч үлдэх шаардлагатай асуудлаар бүхий л талаар харилцан мэдээлэл солилцож хамтарч ажиллахаа талууд илэрхийллээ.

ШҮҮГЧДИЙН ХОРООНЫ УДИРДАХ ЗӨВЛӨЛ

2016.08.24.