Монголын Хуульчдын холбооны Хуульчдын эрх, хууль ёсны ашиг сонирхлыг хамгаалах хорооноос есдүгээр сарыг “Хуульчдын эрхийг хамгаалах сар” болгон зарлаад байгаа бөгөөд энэ хүрээндээ өнөөдөр /2016.09.21/ “Өмгөөлөгчийн эрх зүйн орчин, түүнийг сайжруулах арга зам” хэлэлцүүлгийг зохион байгууллаа.
Хэлэлцүүлгийг Монголын Хуульчдын холбооны Тамгын газрын дарга Ц.Ганболд нээж үг хэлсэн бөгөөд тэрбээр “Монголын Хуульчдын холбооноос нийт гишүүн хуульчдынхаа эрх, ашгийг хамгаалах чиглэлээр олон үйл ажиллагааг явуулсаар байна. Энэ удаа бид өмгөөлөгчдийн эрх зүйн орчны асуудлыг хөндөн ярилцаж, өмгөөлөгч нарт тулгамдаж буй асуудал юу байна, эрх зүйн орчныг хэрхэн сайжруулах вэ гэдэгт анхаарч, өмгөөлөгчдийнхөө санал, дүгнэлтийг сонсохыг зорилоо” хэмээв.
Хэлэлцүүлэгт Хуульчдын эрх, хууль ёсны ашиг сонирхлыг хамгаалах асуудал эрхэлсэн хорооны дарга Ж.Ариунаа, тус хорооны гишүүн, Өмгөөлөгчдийн холбооны ерөнхийлөгч Б.Ганбаатар, тус хорооны гишүүн, өмгөөлөгч Э.Болорчулуун, Өмгөөллийн “Адвокат консалтинг” нөхөрлөлийн зөвлөх, өмгөөлөгч Д.Батсүх, Өмгөөлөгчдийн хорооны тэргүүн Д.Түвшинтамир болон 20 гаруй хуульч, өмгөөлөгч, судлаачид оролцож, саналаа солилцсон юм.
Тус хэлэлцүүлгийн үеэр өмгөөлөгч Д.Батсүх “Өмгөөлөгчийн эрх зүйн орчин” сэдвээр, Өмгөөлөгчдийн холбооны ерөнхийлөгч Б.Ганбаатар “Хэргийн оролцогч нарт хүлээлгэж буй хариуцлага” сэдвээр, Монголын Олон Улсын ба Үндэсний арбитрын гадаад харилцааны мэргэжилтэн М.Мөнхнаран “Өмгөөлөгчдийн эрхийн хамгаалалт: Олон улсын түвшинд ба Монгол Улсад тулгамдаж буй асуудал” сэдвээр, өмгөөлөгч Ж.Содномдаржаа “Хуульчийн мэргэжлийн үйл ажиллагаа эрхлэх эрхгүй этгээд шүүхэд төлөөлж байгаа холбогдох эрх зүйн асуудал” сэдвүүдээр илтгэл хэлэлцүүлсэн.
Хэлэлцүүлэгт өмгөөлөгч, судлаач, хуульчдын төлөөлөл оролцож, өмгөөлөгчийн эрх зүйн орчин ямар түвшинд байгаа талаар саналаа солилцож, зөвлөмж гаргахаар шийдвэрлэлээ. Тус зөвлөмжийг Хуульчийн эрх зүйн байдлын тухай хуульд оруулах нэмэлт, өөрчлөлтийн саналыг Хуульчдын холбооны ээлжит бус Их их хуралд танилцуулах үеэр санал болгож хэлэлцүүлэх юм.
