Монголын Хуульчдын холбооны ерөнхийлөгч Б.Гүнбилэгээр ахлуулсан ажлын хэсэг Монголын Хуульчдын холбооны үйл ажиллагааг сурталчлах, 2016 оны үргэлжилсэн сургалтыг зохион байгуулах, тухайн орон нутгийн салбар зохицуулагчийг томилох зорилгоор 2016 оны есдүгээр сарын 19, 20-ны өдрүүдэд Архангай аймагт ажиллалаа.

    Ажлын хэсгийн үйл ажиллагааны хөтөлбөрт заагдсаны дагуу Хуульчдын холбооны ерөнхийлөгч Б.Гүнбилэг “Үндсэн хуулийн эрх зүй” сэдвээр, УЕПГ-ын Ял эдлүүлэх ажиллагаанд хяналт тавих хэлтсийн дарга Ц.Мөнхбат “Шүүхийн шийтгэх тогтоол биелүүлэхтэй холбоотой асуудал” сэдвээр, УЕПГ-ын хяналтын прокурор Ц.Насанбат “Нотлох баримт” сэдвээр, Иргэний хэргийн давж заалдах шатны шүүхийн шүүгч Э.Золзаяа “Иргэний хэрэг шүүхэд хянан шийдвэрлэх ажиллагаа” сэдвээр тус тус сургалт явуулсан. Сургалтад Өвөрхангай аймагт хуульчийн мэргэжлийн үйл ажиллагаа эрхлэн явуулж буй 30 гаруй хуульч хамрагдлаа.

    Энэ үеэр ажлын хэсгийн ахлагч, Хуульчдын холбооны ерөнхийлөгч Б.Гүнбилэг орон нутгийн хуульчидтай уулзаж, Хуульчдын холбооноос хийж хэрэгжүүлж буй ажлыг танилцуулж, хуульчдын сонирхсон асуултад хариулж, санал солилцсон. Мөн Хуульчдын холбооны энгэрийн тэмдэг болон Холбооноос гаргасан шинэ хуулиудын эмхтгэл, гарын авлагыг хуульчдад үнэ төлбөргүй олголоо.

    Ажлын хэсэг Хуульчдын холбооны Архангай аймаг дахь салбарын зохицуулагчийг сонгох сонгуулийг зохион байгуулсан бөгөөд тухайн аймагт мэргэжлийн үйл ажиллагаа явуулж буй хуульчдын дунд нууц санал хураалт явуулсны дүнд Архангай аймаг дахь салбарын зохицуулагчаар хуульч С.Пүрэвсүрэн сонгогдлоо.