Хуульчийн эрх зүйн байдлын тухай хууль, Хуульчийн эрх зүйн байдлын тухай хуулийг дагаж мөрдөх журмын тухай хуулийн хэрэгжилтийг хангах, хуульчийн мэргэжлийн үйл ажиллагаа эрхэлж буй өмгөөлөгч, өмгөөллийн хуулийн этгээдийн ажлын байрыг хамгаалах зорилгоор Монголын Хуульчдын холбооноос Оюуны өмч, улсын бүртгэлийн ерөнхий газар, Нийгмийн даатгалын ерөнхий газартай хамтран дараах ажлыг зохион байгуулж байна.
Үүнд:
1. Хуульчийн эрх зүйн байдлын тухай хуулийн 39 дүгээр зүйлийн 39.1 дэх хэсэг “Өмгөөлөгч багшлах, эрдэм шинжилгээний болон өмгөөллийн хуулийн этгээд, Хуульчдын холбоонд хамаарахаас бусад ажил албан тушаалыг хавсран эрхлэх”-ийг хориглоно.
2.Хуульчийн эрх зүйн байдлын тухай хуулийн 36 дугаар зүйлийн 36.3 “Хуульчийн мэргэжлийн үйл ажиллагаа хамтран эрхлэх хуулийн этгээдийн хэлбэр нь хязгаарлагдмал хариуцлагатай нөхөрлөл байна”, Хуульчийн эрх зүйн байдлын тухай хуулийг дагаж мөрдөх журмын тухай хуулийн 6 дугаар зүйлийн 6.1 дэх хэсэг “Нөхөрлөлийн тухай хуульд нийцүүлэн өөрчлөн байгуулагдаж, хуулийн этгээдийн улсын бүртгэлд шинэчлэн бүртгүүлнэ.
3. Хуульчийн эрх зүйн байдлын тухай хуулийн 36 дугаар зүйлийн 36.5 дахь хэсэг “Өмгөөллийн хуулийн этгээдийг Улсын бүртгэлд бүртгүүлснээс хойш 14 хоногийн дотор Хуульчдын холбоонд бүртгүүлнэ” гэсэн заалтуудыг зөрчин үйл ажиллагаа явуулж буй өмгөөлөгч, өмгөөллийн хуулийн этгээдүүдийн эрхийг хуульд заасан үндэслэлээр хүчингүй болгох хүртэл арга хэмжээ авч ажиллаж байна.
Иймд давхар ажил эрхэлж буй болон аливаа нэгэн байгууллагаар нийгмийн даатгал төлүүлж буй өмгөөлөгчид шүүхэд төлөөлөх эрхээ түдгэлзүүлэх, нийгмийн даатгалаа төрийн болон аж ахуйн нэгжээр төлүүлж байгаа өмгөөлөгч үндэслэлээ мэдүүлэх, Монголын Хуульчдын холбоонд бүртгүүлэлгүй үйл ажиллагаа явуулж буй нөхөрлөлүүд Монголын Хуульчдын холбоонд бүртгүүлэх, хуульд заасны дагуу өөрчлөн байгуулагдаагүй хуульчийн мэргэжлийн үйл ажиллагаа эрхэлж байгаа болон мэргэжлийн үйл ажиллагаа эрхлээгүй боловч хуульчийн мэргэжлийн үйл ажиллагаа эрхлэхээр үйл ажиллагааны чиглэлдээ тусгасан ХХК болон бусад хуулийн этгээдүүд өөрсдийн хүсэлтээр татан буулгах, үйл ажиллагааны чиглэлээсээ хуульчийн мэргэжлийн үйл ажиллагаа эрхлэх заалтыг хасч Хуульчдын холбоонд мэдэгдэх шаардлагатай байна.
Монголын Хуульчдын холбоонд 2016 оны 12 дугаар сарын 25-наас өмнө шүүхэд төлөөлөх эрхээ түдгэлзүүлэх хүсэлт гаргаагүй давхар ажил эрхэлж байгаа өмгөөлөгч, тус холбоонд бүртгүүлэлгүй үйл ажиллагаа явуулж байгаа өмгөөллийн нөхөрлөлийн удирдлагуудыг Мэргэжлийн хариуцлагын хороонд, Өмгөөллийн хуулийн этгээдийг Хуульчийн эрх зүйн байдлын тухай хуулийг дагаж мөрдөх журмын тухай хуулийн 6 дугаар зүйлийн 6.2-т заасны дагуу татан буулгах хүсэлтийг Шүүхэд гарган шийдвэрлүүлэх болно.
Энэ асуудлаар Монголын Хуульчдын холбооны 70116008 тоот утсаар холбогдож мэдээлэл авна уу.
(Та өөрийн нэр байгаа эсэхийг дараах холбоосуудын гарчиг дээр дарж татаж авч үзнэ үү.)
МОНГОЛЫН ХУУЛЬЧДЫН ХОЛБООНЫ ТАМГЫН ГАЗАР
