Монголын Хуульчдын холбооноос өмгөөлөгчийн туслах ажилтнуудад өмгөөллийн ур чадвар, дадал олгох  сургалтыг 2016 оны 10 дугаар сарын 29, 30-ны өдрүүдэд зохион байгууллаа.

    Сургалт нь өмгөөлөгчийн туслах ажилтнуудад авлига, ашиг сонирхлын зөрчлөөс урьдчилан сэргийлэх, хуульчийн харилцаа, хандлага, өмгөөллийн үйл ажиллагааны хэлбэр, өмгөөлөгчийн туслахын ажил эрхлэлт, хүлээсэн чиг үүрэг, тэдгээрийн хэрэгжилтийн талаар  зохих түвшний  мэдлэг олгох зорилготой байсан бөгөөд сургалтын нээлтэд Хуульчдын холбоо Бодлого зохицуулалтын хэлтсийн дарга, А.Оюунчимэг, тус холбооны Өмгөөлөгчдийн хорооны тэргүүн Д.Түвшинтамир нар оролцож үг хэлсэн.

    Сургалтын хүрээнд Монголын Хуульчдын холбооны гишүүн хуульч, өмгөөлөгчид болон Авлигатай тэмцэх газар, АШУИС-ийн багш нар дараах сэдвүүдээр хичээл заалаа. Тодруулбал, “Хуульчийн харилцаа хандлага” сэдвээр АШУҮИС-ийн багш доктор С.Наранчимэг, “Монгол Улсын авлигын нөхцөл байдал” сэдвээр АТГ-аас Ц.Шинэбаяр, “Авлига, Ашиг сонирхлын зөрчлөөс урьдчилан сэргийлэх” сэдвээр АТГ-аас А.Дэлгэрбаяр, “Өмгөөлөгчийн мэргэжил, мэргэшил”, “Хууль зүйн мэргэжлийн туслалцаа, архив албан хэрэг хөтлөлт” сэдвээр МХХ-ны гишүүн хуульч, өмгөөлөгч Д.Батсүх, Өмгөөллийн үйл ажиллагааны зохион байгуулалтын хэлбэр ба өмгөөлөгчийн туслахын ажил эрхлэлт”, “Өмгөөлөгчийн мэргэжлийн үйл ажиллагааны төрөл ба өмгөөлөгчийн туслахын оролцоо” сэдвээр  МХХ-ны гишүүн хуульч, өмгөөлөгч З.Сүхбаатар нар тус тус хичээл заасан юм.

    Сургалтад нийт 50 гаруй өмгөөлөгчийн туслах ажилтан хамрагдсан бөгөөд сургалтын үеэр тэдэнд “Өмгөөлөгчийн туслахын үнэмлэх” болон сургалтад хамрагдсан гэрчилгээ, Хуульчдын холбооноос гаргасан дүрэм, журмын эмхэтгэлийг олгосон.