Хуульчдын холбооны зөвлөлийн ээлжит хуралдаан 2016 оны 11 дүгээр сарын 05-ны өдөр болж, 4 асуудлыг хэлэлцэн дараах шийдвэрүүдийг гаргалаа.

    Шүүгчид нэр дэвшигчдийн талаар дүгнэлт гаргалаа

    Шүүхийн ерөнхий зөвлөлийн даргын 2016 оны 77, 84, 85, 99 дугаар тушаалаар зарласан анхан болон давж заалдах шатны шүүхийн шүүгч, Ерөнхий шүүгч, хяналтын шатны шүүхийн шүүгчид нэр дэвшсэн 63 хуульчийн мэргэшил, ур чадвар, нэр хүндийн талаарх Шалгалтын болон Ёс зүйн хорооны дүгнэлтийг баталгаажууллаа.

Тогтоол, түүний хавсралттай ЭНД дарж танилцана уу.

    Хуульчийн мэргэжлийн дадлагыг тооцох тухай журмын төслийг санаачилсан хороонд буцаалаа

    2015 оны 10 дугаар сарын 02-ны өдрийн Монголын Хуульчдын холбооны хоёрдугаар их хурлын 3 дугаар тогтоолоор батлагдсан Монголын Хуульчдын холбоо, түүний бүтцийн байгууллагуудаас дүрэм, журам боловсруулахад баримтлах журмын 5.2 дугаар зүйлийн 6 дахь хэсэгт үндэслэн Хуульчийн мэргэжлийн дадлагыг тооцох тухай журмын төслийг санаачлагч Шалгалтын хороонд буцааж, журмын шаардлага хангуулан ирүүлэхийг даалгалаа.

    Тогтоолтой ЭНД дарж танилцана уу.

    Хуульчийн мэргэжлийн дүрэм, ёс зүйн асуудал эрхэлсэн хорооны зарим гишүүнийг чөлөөллөө

    Хуульчдын холбооны зөвлөлийн 2014 оны 06 дугаар сарын 06-ны өдрийн хурлын 79 дүгээр тогтоолоор батлагдсан “Монголын Хуульчдын холбооны Мэргэжлийн хариуцлагын хорооны ажиллах журам”-ын 2.2 дугаар зүйлийн 1 дэх хэсэгт “Хороо нь маргаан хянан шийдвэрлэх эрх мэдлийг аливаа байгууллага, албан тушаалтан, бусад этгээдээс хараат бусаар хэрэгжүүлнэ”, 4 дэх хэсэгт “Холбооны зөвлөлийн гишүүн, Ерөнхийлөгч, Тамгын газрын дарга, Хяналтын зөвлөл, чиг үүргийн хорооны дарга, гишүүн зэрэг Холбооны албан тушаалтан, ажилтан Хорооны гишүүн, Ажлын албаны дарга, сахилгын шинжээч, шалгагч, бусад ажилтнаар ажиллахыг хориглоно” гэж тус тус заасан байдаг.

    Мэргэжлийн хариуцлагын хорооны бүрэлдэхүүнийг 2016 оны 10 дугаар сарын 14-ний өдрийн Монголын Хуульчдын холбооны ээлжит бус их хурлын 4 дүгээр тогтоолоор батламжилсан. Тус хорооны бүрэлдэхүүнд Хуульчийн мэргэжлийн дүрэм, ёс зүйн асуудал эрхэлсэн хорооны гишүүн Д.Баянжаргал, Д.Мөнгөнцэцэг нар сонгогдсон тул Мэргэжлийн хариуцлагын хорооны ажиллах журмын дээрх заалтыг хангаж ажиллах хүрээнд чиг үүргийн хорооны гишүүнээс чөлөөллөө.

    Тогтоолтой ЭНД дарж танилцана уу.

    Хяналтын зөвлөлийн бүрэлдэхүүнийг шинээр томиллоо

    Хуульчийн эрх зүйн байдлын тухай хуулийн 51 дүгээр зүйлийн 51.2, Монголын Хуульчдын холбооны дүрмийн 7.2 дугаар зүйлийн 1, 3, 4, 7.5 дугаар зүйлийн 1 дэх хэсэгт үндэслэн шүүгч, прокурор, өмгөөлөгчдийн хорооноос ирүүлсэн саналыг үндэслэн Боролзойн Халиун, Дамдины Батцэцэг, Түвшинтөгсийн Мөнхбаяр, Чүлтэмийн Гүнждагва, Гомбосүрэнгийн Хишигсүрэн нарыг Монголын Хуульчдын холбооны хяналтын зөвлөлийн гишүүнээр томиллоо.

    Тогтоолтой ЭНД дарж танилцана уу.