Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхлэх хорооноос ахлах ангийн сурагч, нэгдүгээр курсын оюутнуудад эрх зүйн боловсрол олгох зорилготой “ГЭМТ ХЭРГЭЭС УРЬДЧИЛАН СЭРГИЙЛЭХ НЬ” сэдэвт хичээлийн хөтөлбөрийг амжилттай хэрэгжүүлж буй. Энэ хүрээнд 2016 оны 11 дүгээр сарын 14-ний өдөр Хуульчдын холбооны гишүүн хуульч, өмгөөлөгч П.Ариунаа Эрүүл мэндийн шинжлэх ухааны их сургуулийн харъяа Сувилахуйн ухааны сургуулийн нэгдүгээр курсын оюутнуудад, Хуульчдын холбооны гишүүн хуульч, өмгөөлөгч О.Чулуунцэцэг Боловсролын их сургуулийн нэгдүгээр курсын оюутнуудад гэмт хэргээс хэрхэн урьдчилан сэргийлэх талаар хичээл заалаа.  

    Уг хөтөлбөрт заагдсаны дагуу оюутнуудад гэмт хэргээс хэрхэн урьдчилан сэргийлэх талаар хичээл заах хугацаа нь 2016 оны 11 дүгээр сарын 18-нд дуусах бөгөөд цаашид Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхэлсэн хороо болон Монгол Улсын Хүний эрхийн үндэсний комисс хамтран гэмт хэргээс урьдчилан сэргийлэх хичээлийн хөтөлбөрийг шинэчлэн боловсруулж, хөтөлбөрт хамрагдаагүй Нийслэлийн их,дээд сургууль, коллеж болон орон нутгийн дунд сургуулиудад хэрэгжүүлэхээр төлөвлөөд байна.