Монголын Хуульчдын холбооны ерөнхийлөгч Б.Гүнбилэгээр ахлуулсан ажлын хэсэг Монголын Хуульчдын холбооны үйл ажиллагааг сурталчлах, 2016 оны үргэлжилсэн сургалтыг зохион байгуулах, тухайн орон нутгийн салбар зохицуулагчийг томилох зорилгоор 2016 оны 11 дүгээр сарын 30-наас 12 дугаар сарын 01-ний өдрүүдэд Төв аймагт ажиллалаа.
Ажлын хэсгийн үйл ажиллагааны хөтөлбөрт тусгагдсаны дагуу Монголын Хуульчдын холбооны ерөнхийлөгч Б.Гүнбилэг “Үндсэн хуулийн эрх зүй” сэдвээр, Монголын Хуульчдын холбооны зөвлөлийн гишүүн Ц.Өрнөндэлгэр “Иргэний хэрэг шүүхэд хянан шийдвэрлэх ажиллагааны хугацаа” сэдвээр, Захиргааны эрх зүйн хорооны тэргүүн Д.Ганзориг “Захиргааны ерөнхий хууль” сэдвээр, Хуульчдын холбооны гишүүн хуульч, доктор Б.Өнөрмаа "Авлига, албан тушаал" сэдвээр, хуульч Э.Ариунаа "Гэрээний эрх зүй" сэдвээр тус тус сургалт явуулсан. Сургалтад Төв аймагт хуульчийн мэргэжлийн үйл ажиллагаа эрхэлж буй 45 хуульч хамрагдсан юм.
Ажлын хэсэг нь Хуульчдын холбооны Төв аймаг дахь салбарын зохицуулагчийг сонгох сонгуулийг зохион байгуулсан бөгөөд тухайн аймагт мэргэжлийн үйл ажиллагаа явуулж буй хуульчдын дунд нууц санал хураалт явуулсны дүнд Төв аймаг дахь салбарын зохицуулагчаар хуульч Б.Баярмагнай сонгогдоод байна.
