Монголын иргэний нийгмийн байгууллагууд хамтран 2015 онд УИХ-аас баталсан Эрүүгийн хууль хүний эрхэд суурилсан эсэхийг танилцуулах “Мэдээллийн зах” өдөрлөг зохион байгуулна.
Өнөөдөр хүчин төгөлдөр мөрдөгдөж байгаа Эрүүгийн хуулийг гэмт этгээдийг хорихыг урьтал болгодог, хохирогч хохироод үлддэг, иргэдийг гэмт халдлагаас үр нөлөөтэй хамгаалж чадахгүй байгаагаас гадна олон улсын гэрээ, конвенцид нийцүүлэх шаардлагатай гэж үзсэний үндсэн дээр шинэчлэн найруулж 2015 оны 12-р сарын 3-ны өдөр баталсан билээ.
Тиймээс тус үйл ажиллагааны үеэр шинэ Эрүүгийн хуулийн хүний эрх, эрх чөлөөг хамгаалахад чиглэсэн онцлох өөрчлөлт, хүүхдийн эсрэг гэмт хэрэг, гэр бүлийн хүчирхийлэл, хүн худалдаалах гэх мэт гэмт хэрэгт ногдуулах ялын бодлого, өмнөх хуулиас ялгаатай тал зэргийн талаар энэ чиглэлээр мэргэшин ажилладаг иргэний нийгмийн байгууллагуудаас дэлгэрэнгүй мэдээлэл авах боломжтой.
“Мэдээллийн зах” өдөрлөгийг иргэний нийгмийн байгууллагууд хамтран Олон улсын хүний эрхийн өдрийг тохиолдуулан зохион байгуулж байгаа бөгөөд 2016 оны 12 дугаар сарын 9-ний өдөр "Blue Sky" зочид буудлын “Диамонд” танхимд 11:00-14:00 цагийн хооронд болно.
