Улсын Ерөнхий прокурорын газар, Хүний эрхийн үндэсний комисс, Шүүхийн шийдвэр гүйцэтгэх Ерөнхий газар, Монголын Хуульчдын холбоо, МУИС-ийн Хууль зүйн сургууль, "Шихихутаг" Хууль зүйн сургууль хамтран  "Цагдан хорих ажиллагаа ба хүний эрх” сэдэвт хэлэлцүүлгийг 2016 оны 12 дугаар сарын 26-ны өдөр зохион байгууллаа.

    Хэлэлцүүлгийг Монгол Улсын Ерөнхий прокурорын орлогч, Төрийн хууль цаазын шадар зөвлөх Ц.Бямбацогт нээж, оролцогчдод амжилт хүслээ.

    Энэ үеэр Хүний эрхийн үндэсний комиссийн гишүүн, доктор, профессор П.Оюунчимэг "Цагдан хорих таслан сэргийлэх арга хэмжээг хэрэглэхэд хүний эрхийг хангаж байгаа нөхцөл байдал”, МУИС-ийн Хууль зүйн сургуулийн Нийтийн эрх зүйн тэнхимийн эрхлэгч доктор, профессор Д.Баярсайхан "Цагдан хорих ажиллагаанд хүний эрхийг хангах шаардлага, нийтлэг жишиг, чиг хандлага”, "Шихихутаг" их сургуулийн багш, доктор Р.Оюунбадам "Цагдан хоригдсон этгээдийн эрх зүйн байдал, тулгамдсан асуудал”, ШШГЕГ-ын Мэргэжлийн удирдлага, харуул хамгаалалтын хэлтсийн дарга, дэд хурандаа Ч.Мөнх-Эрдэнэ "Цагдан хорих ажиллагааны явцад эрүүдэн шүүхээс урьдчилан сэргийлэх нь”, УЕПГ-ын Ял эдлүүлэх ажиллагаанд хяналт тавих хэлтсийн хяналтын прокурор О.Машбат "Цагдан хорих ажиллагаан дахь зарим тулгамдсан асуудал”, МУИС-ийн Хууль зүйн сургуулийн магистр Л.Содбаяр "Цагдан хорих ажллагаанд тавих шүүхийн болон прокурорын хяналтын зааг ялгааг тодорхойлох”, сэдвээр тус тус илтгэл тавьж хэлэлцүүллээ.

    Дээрх арга хэмжээнд Улс, Нийслэл, Тээвэр, Дүүрэг, Төв аймгийн прокурорын газрын Ял эдлүүлэх ажиллагаанд хяналт тавих ажил хариуцсан прокурорууд, УЕПГ-ын Хэрэг бүртгэх, Мөрдөн байцаах ажиллагаанд хяналт тавих хэлтсийн хяналтын прокурор М.Гантулга, н.Гэрэл болон ШШГЕГ-ын холбогдох бусад албан тушаалтнууд оролцлоо.