Монголын Хуульчдын холбоо нь Шүүхийн ерөнхий зөвлөлтэй харилцан тохиролцож шүүхийн байранд өмгөөлөгчийн ажлын өрөөг бий болгон тохижуулж байгаа билээ.

    Энэ ажлын үргэлжлэл болгож Нийслэл дэх Захиргааны хэргийн анхан шатны шүүхийн байранд өмгөөлөгчийн өрөөг тохижуулж, нээлтийн ёслолын ажиллагааг өнөөдөр /2017.01.27/ зохион байгууллаа.

    Нээлтийн ёслолд Хуульчдын холбооны Тамгын газрын дарга Ц.Ганболд, Нийслэл дэх Захиргааны хэргийн анхан шатны шүүхийн Ерөнхий шүүгч Ц.Батсүрэн, тус шүүхийнТамгын газрын дарга Д.Ганбаатар, Хуульчдын холбооны Өмгөөлөгчдийн хорооны тэргүүн Д.Түвшинтамир, Удирдах зөвлөлийн гишүүн, Өмгөөлөгчдийн холбооны дэд ерөнхийлөгч Б.Батзоригт болон өмгөөлөгчдийн төлөөлөл оролцсон юм.

       Өмгөөлөгчдийн өрөөнд хууль тогтоомж, компьютер, зурагт, интернэт /wifi/ байрлуулж өгснөөр өмгөөлөгч мэргэжлийн үйл ажиллагаагаа явуулахад түлхэц болж байгаа төдийгүй шүүх хурал хүлээх зуураа бусад нээлттэй шүүх хурлуудыг онлайнаар үзэх боломж бүрдлээ. Түүнчлэн өмгөөлөгчид шүүхийн байранд ажлын өрөөтэй болсноор шүүх хурлын бэлтгэлээ бүрэн хангах, хавтаст хэрэгтэй нухацтай танилцах, үйчлүүлэгчтэйгээ ганцаарчлан уулзах, шаардлагатай хууль тогтоомжоо интернэтээр үзэх, шүүх хуралдааны завсарлагаанаар тухлаг байх зэрэг олон давуу талтай. Учир нь өмгөөлөгчид шүүх дээр албан өрөөгүй байхдаа үйлчлүүлэгч болон мэтгэлцэгч талтай хамт коридорт зогсож байгаад шүүх хуралд ордог төдийгүй үйлчлүүлэгчтэйгээ машинд эсвэл гадаа уулздаг, хавтаст хэрэгтэйгээ танилцах гэж шүүхийн туслахуудын өрөөнд дугаарлах зэрэг хүндрэл үүсдэг байсан юм.

       Иймд Монголын Хуульчдын холбооноос шүүхийн байранд өмгөөлөгчийн ажлын өрөө тохижуулах ажлыг санаачлан хэрэгжүүлж байгаа бөгөөд цаашид бусад шүүхийн байранд өмгөөлөгчийн өрөө байгуулж, тохижуулахаар холбогдох шүүхүүдтэй ярилцаж байна.

    Өмгөөлөгчийн өрөөг тохижуулах ажилд нэг сая төгрөгийн хандив өгсөн Өмгөөллийн "Жалайрчо" ХХН-ийн захирал Д.Нямдорж, номын хандив өгсөн  өмгөөлөгч О.Чулуунцэцэг, С.Оюун болон Хуульчдын холбооны Бодлого зохицуулалтын хэлтсийн дарга А.Оюунчимэг нарт талархал илэрхийлье.

    Өмгөөлөгчийн өрөөг нээх ёслолын ажиллагааны үеэр Хуульчдын холбооны Тамгын газрын дарга Ц.Ганболд Захиргааны хэргийн анхан шатны шүүхийн үйл ажиллагаатай танилцав.