“Виз, шилжилт хөдөлгөөний асуудлаар хуулийн зөвлөгөө өгөх үндэсний эрх зүйн орчин“ сэдэвт хэлэлцүүлгийг ГХЯ-наас Монголын Хуульчдын холбоотой хамтран нэгдүгээр сарын 30-ны өдөр зохион байгуулав. Хэлэлцүүлэгт Улсын Ерөнхий прокурорын газар, Монголын Хуульчдын холбоо, Австрали, АНУ, Казахстан, БНЧехУ, Болгар, Вьетнам, Герман, Итали, Их Британи, Канад, Куба, Кувейт, Лаос, ОХУ, Унгар, Энэтхэг, Франц, Япон зэрэг орны Улаанбаатар дахь ЭСЯ-ны дипломатууд оролцов.

    Монголын Хуульчдын холбооноос нийт хуульчдын дунд явуулсан судалгааны дүн, өнөөгийн  эрх зүйн орчин, цаашид авч хэрэгжүүлэх арга хэмжээний талаар Олон улсын эрх зүйн хорооны гишүүн, Өмгөөллийн “FOM Partners” ХХН-ийн гүйцэтгэх захирал Б.Баттуул “Шилжин суурьшигсад-Хууль эрх зүйн туслалцаа” сэдвээр илтгэл хэлэлцүүлсэн. Улсын Ерөнхий прокурорын газраас виз зуучлах нэрийн дор үйлдэгдсэн гэмт хэргийн байдал, иргэдэд учирсан хохирол, энэ төрлийн гэмт хэрэгтэй тэмцэх эрх зүйн орчны талаар танилцуулав. Мөн АНУ-ын ЭСЯ-наас визний мэдүүлэг, баримт бичиг хуурамчаар үйлдэхээс урьдчилан сэргийлэх тухай сургалтын хөтөлбөрийнхөө талаар мэдээлэл өгөв. Визний хууль бус зуучлал, залилангийн холбоотой хэргийг ЭСЯ-наас Гадаад харилцааны яамаар дамжуулан Улсын Ерөнхий прокурорын газарт хүргүүлж байхаар тогтов.

    Цаашид Монголын хуульчид гадаад орны шилжилт хөдөлгөөний хуулийн талаар судалгааг гүнзгийрүүлэх, хуульчдын чадамжийг нэмэгдүүлэх, иргэдэд зөвлөгөө өгөх эрх зүйн орчинг бүрдэлдүүлэх нь зүйтэй гэсэн дүгнэлтэд хүрлээ.