Хуульчдын холбооны Ерөнхийлөгч Б.Гүнбилэгээр ахлуулсан ажлын хэсэг 2017 оны хоёрдугаар сарын 09, 10-ны өдрүүдэд Сүхбаатар аймагт ажиллалаа.

    Ажлын хэсэг нь Хуульчдын холбооны үйл ажиллагааг сурталчлах, Холбооны удирдлагын тогтолцоо, бүтэц зохион байгуулалт, хуулиар хүлээсэн чиг үүрэг, тэдгээрийн хэрэгжилтийн талаар хуульчдад танилцуулж, саналыг сонсохын зэрэгцээ хуульчийн үргэлжилсэн сургалт зохион байгуулах зорилготойгоор орон нутагт ажиллаж буй юм.

    Тус ажлын хэсгийн үйл ажиллагааны хөтөлбөрт тусгагдснаар Хуульчдын холбооны Ерөнхийлөгч Б.Гүнбилэг “Үндсэн хуулийн эрх зүй” сэдвээр, Иргэний хэргийн давж заалдах шатны шүүхийн шүүгч Э.Золзаяа “Иргэний хэрэг шүүхэд хянан шийдвэрлэх ажиллагаа”, “Өв залгамжлал” сэдвээр, доктор М.Цэрэнбат “Шүүх ДНХ шинжилгээ”, “Хүн амын эрүүл мэндийн эсрэг гэмт хэрэг” сэдвээр тус тус хичээл заасан бөгөөд сургалтад Сүхбаатар аймагт хуульчийн мэргэжлийн үйл ажиллагаа явуулж буй 30 гаруй хуульч хамрагдлаа.

            Тус аймгийн салбар зохицуулагчаар ажиллаж байсан хуульч Ц.Энх-Амар нь өөр аймагт томилогдон ажиллах болсон тул Ажлын хэсэг нь Сүхбаатар аймгийн салбар зохицуулагчийг сонгох сонгуулийг дахин зохион байгуулсан бөгөөд Сүхбаатар аймаг дахь салбарын зохицуулагчаар хуульч У.Болдхүү сонгогдлоо.