Монголын Хуульчдын холбооны Олон улсын эрх зүйн хорооноос Гадаад харилцааны яамны Консулын газар, Хууль зүй, дотоод хэргийн яам, Гадаадын иргэн, харьяатын газар, Улсын ерөнхий прокурорын газар, Монгол Улсад суугаа Дипломат төлөөлөгчийн газар болон Олон улсын шилжилт хөдөлгөөний байгууллагын төлөөлөгчийн газартай хамтран 2017 оны 01 дүгээр сарын 30-ны өдөр “Виз, шилжилт хөдөлгөөний асуудлаар хуулийн зөвлөгөө өгөх үндэсний эрх зүйн орчин” сэдэвт хэлэлцүүлгийг амжилттай зохион байгуулсан билээ.

    Хэлэлцүүлгийн дүнд виз зуучлах нэрийн дор иргэдийг залилан мэхлэж, их хэмжээний хохирол учруулах гэмт хэргийн тоо сүүлийн жилүүдэд өсөж байгаа энэ үед бусад улс орны шилжилт хөдөлгөөний талаарх эрх зүйн зохицуулалтыг гүнзгийрүүлэн судлах, иргэдэд зөвлөгөө өгөх эрх зүйн орчинг бүрдүүлэх, энэ чиглэлээр мэргэшсэн хуульчдыг бэлтгэх нь зүйтэй гэсэн нэгдсэн дүгнэлтэд хүрсэн.

    Монголын Хуульчдын холбооноос энэ чиглэлээр мэргэшсэн хуульч бэлтгэх ажлыг эхлүүлэхээр төлөвлөж байгаа бөгөөд цаашид виз, шилжилт хөдөлгөөний асуудлаар мэргэшин ажиллах хүсэл сонирхолтой, англи хэлний өндөр мэдлэгтэй хуульчдыг бүртгэж байна.

    Сонирхож буй хуульчид та бүхэн Монголын Хуульчдын холбооны Гадаад харилцааны мэргэжилтэн Х.Дөлгөөн (утасны дугаар: 95209241) болон Олон улсын эрх зүйн хороо хариуцсан мэргэжилтэн Б.Буянжаргалтай (утасны дугаар: 99630468) холбогдож бүртгүүлнэ үү.

    Жич: Эхний 30 хуульчийг бүртгэхийг анхаарна уу.

Гадаад харилцаа, хамтын ажиллагааны хэлтэс