Шүүхийн ерөнхий зөвлөл, Монголын Хуульчдын холбоо, Монголын өмгөөлөгчдийн холбоо, Монголын хуульчдын нийгэмлэг хамтран өнөөдөр /2017.02.23/ "Иргэний хэрэг шүүхэд хянан шийдвэрлэхэд тулгамдаж буй асуудал” сэдэвт хэлэлцүүлэг зохион байгууллаа.

    Хэлэлцүүлэгт Шүүхийн ерөнхий зөвлөлийн дарга Н.Лүндэндорж, Хуульчдын холбооны Тамгын газрын дарга Ц.Ганболд, Өмгөөлөгчдийн холбооны ерөнхийлөгч Б.Ганбаатар болон нийслэл дэх анхан болон давж заалдах шатны шүүхийн Тамгын газрын дарга нар болон нийслэлд үйл ажиллагаа явуулж буй өмгөөлөгчдийн төлөөлөл, судлаачид оролцлоо. Мөн орон нутаг дахь анхан болон давж заалдах шатны шүүхийн Тамгын газрынхан онлайнаар хэлэлцүүлэгт оролцож, мэдээлэл авав.

    Хэлэлцүүлгийг Шүүхийн ерөнхий зөвлөлийн дарга, профессор Н.Лүндэндорж нээж, "Шүүхийн шинэтгэлийн үр дүн, болж байгаа болон болохгүй байгаа асуудлыг асууж, сонсохгүй бол юу хийж байгаагаа мэдэхээ больчихдог. Тиймээс Та бүхний санал маш их үнэ цэнэтэй. Өнгөрсөн жилүүдэд та бүхний өгсөн саналтай Шүүхийн ерөнхий зөвлөлийн гишүүд нэгбүрчлэн танилцсан. Бодлогын шийдэл гаргахад Та бүхний санал үнэтэй хувь нэмэр оруулсан. Хуульчид та бүхэн мэргэжлийн нүдээр харж байгаа учраас хамгийн өндөр түвшний санал гаргаж, буцах холбоо тогтоодог.” гэдгийг онцоллоо.

     Хэлэлцүүлгийн үеэр зохион байгуулсан байгууллагуудын төлөөлөл саналаа хэлсэн бөгөөд Монголын Хуульчдын холбооны Тамгын газрын дарга Ц.Ганболд “Өнөөдрийн хэлэлцүүлгээр тодорхой шийдэлд хүрч, хууль эрх зүйн орчноо боловсронгуй болгох саналууд гарна гэж харж байна. Өмгөөлөгчид шүүх хуралдааныг хойшлуулж байгаа талаар шүүхээс Монголын Хуульчдын холбоонд гомдол ирдэг. Шүүх хуралдаан хойшлох асуудал маш их байгаа. Энэ нь Шүүхийн ачаалалтай холбоотой. Өөр бусад зүйл ч бий. Үүнээс болж цаана нь эдийн засгийн асуудал яригдаж, өр төлбөр үүсч байдаг” хэмээсэн. 

    Хэлэлцүүлэгт оролцсон өмгөөлөгчид шүүхийн захиргааны ажилтнуудын харилцаа хандлагад шүүмжлэлтэй хандаж байлаа. Мөн иргэний хэргийн хариуцагчийн хаяг тодорхойгүйгээс хэрэг үүсгэдэггүй, хариуцагчийг эрэн сурвалжлах ажиллагаа хийгддэггүй, шүүхэд мэтгэлцэх зарчим хангагддаггүй гэх зэрэг олон асуудлыг хөндөн ярилцсан юм.