Монголын хуульчдын холбооны Өмгөөлөгчдийн хорооноос өчигдөр /2017.03.21/  “Өмгөөллийн үйл ажиллагаанд ногдуулах татвар” сэдэвт хэлэлцүүлгийг Татварын ерөнхий газартай хамтран зохион байгууллаа.  

    Хэлэлцүүлгийг Өмгөөлөгчдийн хорооны Удирдах зөвлөлийн гишүүн, өмгөөлөгч Т.Баярсайхан удирдан явуулсан бөгөөд Хуульчдын холбооны Хяналтын зөвлөлийн гишүүн, өмгөөлөгч Г.Хишигсүрэн “Өмгөөллийн үйл ажиллагааны орлогыг тодорхойлох, цаашид анхаарах асуудал” сэдвээр, “Эрнст энд Янг аудит” ХХК-ийн хуульч О.Тэнгис “Өмгөөллийн үйл ажиллагааны зардлыг тодорхойлох, түүнийг хасагдах зардалд тооцоход анхаарах асуудлууд” сэдвээр хэлэлцүүлэг өрнүүлсэн. Мөн ТЕГ-ын хуулийн хэлтсийн мэргэжилтэн Б.Баттогтох “Өмгөөллийн нөхөрлөлийн үйл ажиллагаанд ногдуулах татвар” сэдвээр, ТЕГ-ын татварын улсын байцаагч И.Мөнхцэцэг “Өмгөөлөгчийн үйл ажиллагаанд ХХАОАТ ногдуулан төлөхөд анхаарах асуудал” сэдвээр, ТЕГ-ын татварын улсын ахлах байцаагч Д.Баярцэцэг “Өмгөөллийн үйл ажиллагаанд НӨАТ ногдуулан төлөхөд анхаарах асуудал” сэдвээр тус тус илтгэл хэлэлцүүлсэн.

    Хэлэлцүүлэгт 80 гаруй гаруй өмөөлөгч оролцож, санал, шүүмжиллээ уламжилсан бөгөөд НӨАТ-ын тухай хуулийн 7-р зүйлийн 7.2.3, 7.2.17 дахь заалт Үндсэн хуулийн холбогдох заалтыг зөрчсөн эсэх асуудлаар Үндсэн хуулийн цэцэд шинэ үндэслэл гарган дахин хандах боломжийг судлах, боломжтой тохиолдолд Цэцэд нэгдсэн байр суурьтайгаар мэдээлэл гаргаж шийдвэрлүүлэх нь чухал байгаа талаар өмгөөлөгчид санал дэвшүүлж байлаа. Мөн Өмгөөллийн үйл ажиллагааг НӨАТ-аас чөлөөлөх асуудлаар НӨАТ-ын хуульд нэмэлт, өөрчлөлт оруулах тодорхой хуулийн төсөл боловсруулах, Өмгөөлөгч, өмгөөллийн нөхөрлөлд орлогын албан татварын хөнгөлөлт эдлүүлэх боломж, үндэслэлийг боловсруулах шаардлагатай байгаа талаар санал гарсан юм.

    Хэлэлцүүлгийн видеог ЭНД дарж үзнэ үү.