Олон Улсын Хуульчдын холбооны 2017 оны ээлжит чуулга уулзалт Австрали Улсын Сидней хотод 2017 оны 10 дугаар сарын 08-13-ны өдрүүдэд зохион байгуулагдах гэж байгаатай холбогдуулан Олон Улсын Хуульчдын холбоо нь энэ жилийн ээлжит чуулга уулзалтад Монголын Хуульчдын холбооны дөрвөн залуу хуульчийг (35 ба түүнээс доош насны) тэтгэлэгээр оролцуулахаар шийдвэрлэсэн.

    Энэхүү боломжийн талаар Хуульчдын холбооны цахим хуудас болон фэйсбүүк хуудсаар дамжуулан нийт хуульчдын дунд нээлттэй зарласан бөгөөд 2017 оны 01 дүгээр сарын 25-аас 03 дугаар сарын 18-ны өдрийг хүртэлх хугацаанд тавигдсан шаардлагын дагуу 11 залуу хуульчийн материалыг хүлээн авсан юм.

    Сонгон шалгаруулах комиссын гишүүнээр Монголын Хуульчдын холбоо болон Олон Улсын Хуульчдын холбооны гишүүн, хуульч Б.Баяр, Монголын Хуульчдын холбооны гишүүн, Захиргааны хэргийн давж заалдах шатны шүүхийн шүүгч Ц.Цогт болон Монголын Хуульчдын холбооны Гадаад харилцаа, хамтын ажиллагааны хэлтсийн дарга Ж.Хунан нар ажилласан.    

    Материалаа ирүүлсэн 11 хуульчаас 8 хуульчийг сонгон шалгаруулахдаа:

• Хуульчийн эрх зүйн байдлын хуулиар хүлээсэн үүргээ биелүүлсэн эсэх;
• Мэргэжлээрээ ажилласан жилийн туршлага;
• Англи хэл дээрх эссэ (Чуулга уулзалтанд оролцохын гол зорилго, оролцсоны дараа гарах үр дүн сэдвээр);
• Өргөдөл (Яагаад Монголын Хуульчдын холбоо өөрийг тань хамруулах ёстой гэж сэдвээр);
• Ярилцлагын шалгалтыг үндэслэл болгосон болно.

    Эхний шатанд тэнцсэн 8 хуульчаас 4 хуульчийг нь Олон Улсын Хуульчдын холбоо сонгон шалгаруулж, тэтгэлэгт хамруулах бөгөөд шалгарсан 4 хуульчийн нэрийг Олон Улсын Хуульчдын холбооноос Монголын Хуульчдын холбоонд эргэн мэдэгдэх юм.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС