Азийн хөгжлийн банкнаас Монгол Улсад хэрэгжүүлж буй “Шүүхийн сургалтын чадавхыг бэхжүүлэх төсөл”-ийн хүрээнд 2017 оны 03 дугаар сарын 20-30-ны өдрүүдэд Эдийн засгийн гэмт хэргийн чиглэлээр сургагч багш бэлтгэх сургалтыг амжилттай зохион байгууллаа.

    Сургалтыг энэ чиглэлээр мэргэшсэн хуульч, татварын байцаагч, эдийн засагчид удирдан явуулсан бөгөөд Америкийн Нэгдсэн Улс болон Бүгд Найрамдах Солонгос Улсаас эдийн засгийн гэмт хэргийн чиглэлээр судалгаа хийдэг профессор, судлаачид хүрэлцэн ирж энэ төрлийн гэмт хэрэгтэй хэрхэн тэмцдэг талаар болоод оногдуулах хариуцлагын талаар туршлага хуваалцсан юм.

    Мөн Монголын Хуульчдын холбооноос тус сургалтыг зохион байгуулагчдад хандан өмгөөлөгчдийг сургалтад хамруулах саналыг тавьсны үндсэн дээр хуульч, өмгөөлөгч С.Оюун, О.Чулуунцэцэг, Т.Урангэрэл, С.Цэмбэлмаа, Б.Энх-Эрдэнэ нар сургалтад амжилттай хамрагдаж, гэрчилгээгээ гардан авлаа.

    Сургалтад хамрагдсан шүүгч, прокурор, өмгөөлөгч нараас 12 суралцагчийг “Сургагч багш”-аар сонгон шалгаруулах бөгөөд шалгарсан сургагч багш нар энэ оны 12 дугаар сард 21 аймгийн нийт 210 гаруй шүүгчдийн дунд эдийн засгийн гэмт хэргийн талаарх сургалтыг зохион байгуулах юм.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС