Монголын Хуульчдын холбооноос 2017 оны дөрөвдүгээр сарын 19, 20, 21-ний өдрүүдэд шинэ хуульчдад сургалт зохион байгууллаа. Тус үйл ажиллагааг Хуульчдын холбооны Бодлого зохицуулалтын хэлтсийн дарга А.Оюунчимэг нээсэн бөгөөд сургалтад 2016 онд хуульчийн мэргэжлийн шалгалтад тэнцэж, мэргэжлийн үйл ажиллагаа эрхлэх зөвшөөрөл авсан 154 хуульчаас 128 нь хамрагдсан.

    Шинэ хуульчид нь энэ удаагийн сургалтаар Хуульчдын холбооны удирдлага, зохион байгуулалт, хуульч гишүүнийхээ хувьд Холбоотой хэрхэн харилцах, эрхээ хэрхэн эдлэж, үүргээ хэрхэн хэрэгжүүлэх үндэслэл, журмын талаар тодорхой мэдээлэл авсан. Мөн Хуульчийн мэргэжлийн үйл ажиллагаанд баримтлах дүрэм, зөрчил хянан шийдвэрлэх тогтолцоо, зохион байгуулалтын талаарх мэдлэгтэй боллоо.

    Тодруулбал, Мэргэжлийн хариуцлагын хорооны дарга, Нийслэлийн иргэний хэргийн давж заалдах шатны шүүхийн шүүгч Э.Золзаяа “Хуульчийн мэргэжлийн хариуцлагын талаарх ойлголт” сэдвээр, Хуульчдын холбооны Ес зүйн хорооны гишүүн, өмгөөлөгч Н.Баасанжав “Хуульчийн мэргэжлийн үйл ажиллагаанд баримтлах дүрэм” сэдвээр, Хуульчдын холбооны Бодлого зохицуулалтын хэлтсийн дарга А.Оюунчимэг болон хороо хариуцсан мэргэжилтнүүд “Хуульчдын холбооны чиг үүрэг” сэдвээр тус тус хичээл заасан юм.

    Энэхүү сургалт нь үнэ төлбөргүй явагдсан бөгөөд сургалтад хамрагдсан 128 хуульчийг 2017 оны хуульчийн үргэлжилсэн сургалтын 1 багц цагийг хангасанд тооцов.