Монголын Хуульчдын холбооны Ерөнхийлөгчийн нэрэмжит “MOCK TRIAL” шүүхийн мэтгэлцээний тэмцээн өнгөрсөн бямба, ням гариг /2017.04.22,23/-т Иргэний хэргийн мэтгэлцээн, Захиргааны хэргийн мэтгэлцээнээр Эрүүгийн хэргийн давж заалдах шатны шүүхийн байранд үргэлжиллээ.
Иргэний хэргийн мэтгэлцээнд МУИС-ийн ХЗС, “Их засаг” Олон улсын их сургууль, “Отгонтэнгэр” их сургууль, Олон улсын “Улаанбаатар” их сургууль, “Шихихутуг” их сургууль, “Ховд” их сургуулийн 6 баг өрсөлдөж, оюун ухаан ур чадвараа уралдуулсан. Хоёр үед шаттай явагдсан тус мэтгэлцээний аваргын төлөөх тоглолтод МУИС-ийн ХЗС, “Шихихутуг” их сургууль, Олон улсын “Улаанбаатар” их сургуулийн баг өрсөлдсөнөөс тэргүүн байрт МУИС-ийн ХЗС-ийн баг, дэд байрт “Шихихутуг” их сургуулийн баг шалгарлаа. Иргэний хэргийн мэтгэлцээнийг Иргэний хэргийн давж заалдах шатны шүүхийн шүүгч Б.Нармандах, Д.Байгалмаа, С.Энхтөр, Иргэний хэргийн анхан шатны шүүхийн шүүгч Ч.Цэнд, Н.Сарангүн, Д.Цэрэндолгор нар бүрэлдэхүүнтэй шүүн явуулсан.
Захиргааны хэргийн мэтгэлцээнд МУИС-ийн ХЗС, “Их засаг” Олон улсын их сургууль, “Отгонтэнгэр” их сургууль, Олон улсын “Улаанбаатар” их сургууль, “Шихихутуг” их сургууль, “Билиг” дээд сургуулийн 6 баг өрсөлдсөн. Үүнээс аваргын төлөөх тоглолтод МУИС-ийн ХЗС, “Их засаг” Олон улсын их сургууль, “Билиг” дээд сургуулийн баг шалгарснаас МУИС-ийн ХЗС-ийн баг тэргүүн байр, “Их засаг” Олон улсын их сургуулийн баг дэд байр эзэллээ. Захиргааны хэргийн мэтгэлцээнийг шүүгч Э.Зоригтбаатар, Д.Оюумаа, Э.Халиунбаяр, Ц.Одмаа, Д.Баатархүү, Д.Чанцалням нар шүүн явуулсан юм.
Хууль зүйн сургуулийн оюутнуудыг “бодит хэрэг” маргаан дээр ажиллуулж шүүхэд нэхэмжлэл, хариу тайлбар боловсруулан гаргах, нотлох баримтад дүн шинжилгээ хийх, өмгөөлөгчийн байр суурьнаас үйлчлүүлэгчийнхээ эрх, хууль ёсны ашиг сонирхлыг хэрхэн хамгаалж оролцох зэргээр мэтгэлцээний үндсэн дээр мэргэжлийн дадал, ур чадварыг эзэмшүүлэх зорилготой тус тэмцээнийн ШАГНАЛ ГАРДУУЛАХ ЁСЛОЛЫН АЖИЛЛАГАА 2017 оны дөрөвдүгээр сарын 27-нд Эрүүгийн хэргийн давж заалдах шатны шүүхийн байранд 16:00 цагаас болно
