Монголын Хуульчдын холбооны Захиргааны эрх зүйн хороо, түүний дэргэдэх Байгаль орчны эрх зүйн дэд хорооноос байгаль орчны эрх зүйн хөгжилд үнэтэй хувь нэмэр оруулсан хуульчдыг дэмжих, сурталчлах, байгаль орчны эрх зүйг хөгжүүлэх зорилгоор “Байгаль орчны эрх зүйн шилдэг хуульч” шагналыг санаачилсан. Энэхүү шагналын анхны эзнээр МУИС-ийн Хууль зүйн сургуулийн багш, шинжлэх ухааны доктор, профессор, гавьяат хуульч Т.Сэнгэдоржийг өргөмжиллөө. “Байгаль орчны эрх зүйн шилдэг хуульч” шагналыг гардуулах ёслолын ажиллагаа өчигдөр /2017.04.25/ Хуульчдын танхимд болсон. 

    Шагнал гардуулах ёслолын ажиллагаанд Монголын Хуульчдын холбооны Ерөнхийлөгч Б.Гүнбилэг, Захиргааны эрх зүйн хорооны тэргүүн, Монгол Улсын Үндсэн хуулийн цэцийн гишүүн Д.Ганзориг, Байгаль орчны эрх зүйн дэд хорооны зохицуулагч  Р.Мөнхзул, Байгаль орчин, аялал жуулчлалын яамны хуулийн хэлтсийн дарга Ч.Раднаабазар нар оролцож, баяр хүргэлээ.

    Тус үйл ажиллагааны үеэр доктор У.Тунгалаг “Байгаль орчны асуудал ба тогтвортой хөгжлийн үзэл баримтлалын уялдаа” сэдвээр, Байгаль орчны эрх зүйн дэд хорооны зохицуулагч Р.Мөнхзул “Байгаль орчныг шүүхийн журмаар хамгаалах эрх зүйн боломж” сэдвээр илтгэл тавьж, нийт оролцогчдын дунд хэлэлцүүлэг өрнүүлсэн.

     “Байгаль орчны эрх зүйн шилдэг хуульч” шалгаруулах арга хэмжээг жил бүр уламжлал болгон зохион байгуулах юм байна.