Монголын Хуульчдын холбооны Ерөнхийлөгчийн нэрэмжит “MOCK TRIAL” шүүхийн мэтгэлцээний тэмцээнд 2017 оны 04 дүгээр сарын 20, 22, 23-ны өдрүүдэд Эрүүгийн хэргийн давж заалдах шатны шүүхийн байранд амжилттай болж өндөрлөлөө.

    Тэмцээний ялагчддад шагнал гардуулах ёслолын ажиллагааг өчигдөр /2017.04.27/-нд зохион байгууллаа. Шагнал гардуулах ёслолын ажиллагаанд Монголын Хуульчдын холбооны Ерөнхийлөгч Б.Гүнбилэг, Эрүүгийн хэргийн давж заалдах шатны шүүхийн Ерөнхий шүүгч Л.Даваасүрэн, Иргэний хэргийн давж заалдах шатны шүүхийн Ерөнхий шүүгч Ж.Оюунтунгалаг, Шүүгчдийн хорооны тэргүүн, Эрүүгийн хэргийн шүүхийн шүүгч Ц.Оч, Хууль зүйн шинжлэх ухаан боловсролын хөгжлийг дэмжих хорооны Удирдах зөвлөлийн гишүүн Н.Чимгээ нар оролцож, ялагчдад баяр хүргэлээ.

    Эрүүгийн хэргийн мэтгэлцээнд МУИС-ийн ХЗС, “Их засаг” Олон улсын их сургууль, Монголын Үндэсний их сургууль “Отгонтэнгэр” их сургууль, Олон улсын “Улаанбаатар” их сургууль, Хууль сахиулахын их сургууль, “Шихихутуг” их сургууль “Түшээ” дээд сургууль, “Ховд” их сургуулийн 9  баг өрсөлдөж, оюун ухаан ур чадвараа уралдуулснаас тэргүүн байрт Монголын Үндэсний их сургуулийн баг, дэд байрт  Хууль сахиулахын их сургуулийн баг шалгарлаа.    

    Иргэний хэргийн мэтгэлцээнд МУИС-ийн ХЗС, “Их засаг” Олон улсын их сургууль, “Отгонтэнгэр” их сургууль, Олон улсын “Улаанбаатар” их сургууль, “Шихихутуг” их сургууль, “Ховд” их сургуулийн 6  баг өрсөлдсөнөөс нэгдүгээр байрт МУИС-ийн ХЗС-ийн баг, дэд байрт “Шихихутуг” их сургуулийн баг шалгарсан. Харин Захиргааны хэргийн мэтгэлцээнд МУИС-ийн ХЗС, “Их засаг” Олон улсын их сургууль, “Отгонтэнгэр” их сургууль, Олон улсын “Улаанбаатар” их сургууль, “Шихихутуг” их сургууль, “Билиг” дээд сургуулийн 6 баг өрсөлдөж, МУИС-ийн ХЗС-ийн баг тэргүүн байр, “Их засаг” Олон улсын их сургуулийн баг дэд байр эзэллээ.

   Тус тэмцээн нь Хууль зүйн сургуулийн оюутнуудыг “бодит хэрэг” маргаан дээр ажиллуулж шүүхэд нэхэмжлэл, хариу тайлбар боловсруулан гаргах, нотлох баримтад дүн шинжилгээ хийх, өмгөөлөгчийн байр суурьнаас үйлчлүүлэгчийнхээ эрх, хууль ёсны ашиг сонирхлыг хэрхэн хамгаалж оролцох зэргээр мэтгэлцээний үндсэн дээр мэргэжлийн дадал, ур чадварыг эзэмшүүлэх зорилготой юм.

    Шагнал гардуулах ёслолын үеэр "Мock trial" тэмцээнийг зохион байгуулахад хамтран ажилласан Эрүүгийн хэргийн давж заалдах шатны шүүхийн хамт олон, Иргэний хэргийн давж заалдах шатны шүүхийн хамт олонд талархал гардуулсан юм.