Монголын Хуульчдын нийгэмлэгийн бүх гишүүдийн хурал 2017 оны дөрөвдүгээр сарын 22-ны өдөр хуралдаж, Нийгэмлэгийнхээ дүрмийн шинэчилсэн найруулгыг баталж, үйл ажиллагааны чиглэл, цаашдын зорилго, зорилтоо хэлэлцсэн байна. Мөн нийгэмлэгийн гүйцэтгэх захирлаар Т.Бат-Оргилыг томилжээ.

 Тус хурлын үеэр “Зээлийн гэрээний эрх зүйн зохицуулалтын зарим асуудал (зээлийн шимтгэл, үүрэг гүйцэтгэх дараалал), шүүхийн шийдвэрт дүн шинжилгээ хийх” сэдвээр МУИС-ийн ХЗС-ийн ахлах багш Д.Энхзул сургалт явуулсан бөгөөд цаашид орон нутгийн хуульчдад зориулсан цуврал сургалтууд зохион байгуулахаар төлөвлөөд байгаа аж.

    Тус нийгэмлэг нь “Арчилсан эрх зүйт төрийг хөгжүүлэхэд салбараа төлөөлөн манлайлж өөрсдийн дуу хоолойг төрийн бодлогод тусгах, хууль ёсыг нийгэмд сурталчлах, дэмжих, хамгаалах” зорилго тавьж,  2020 оны дотор дараах томоохон зорилтуудыг хувь хүний хөгжил, салбарын хөгжил, нийгмийн хөгжил гэсэн чиглэлүүдэд хэрэгжүүлэн ажиллахаар төлөвлөсөн байна.

• Хууль тогтоох, гүйцэтгэх болон шүүх засаглалуудтай салбараа төлөөлөн тогтвортой хамтран ажиллах тогтолцоог байгуулна.
• Эрх зүйн тогтолцоонд оношилгоо хийж, шинэчлэлийн хөтөлбөрүүдийг тодорхойлж, гүйцэтгэлийг хангаж, манлайлна.
• Үндэсний эрх зүйн шинжлэх ухааны хөгжлийг дэмжин, он-лайн платформ үүсгэж, тинк-танк байгуулж, ажиллуулна.
• Эрх зүйт ёсны талаар олон нийтийг соён гэгээрүүлэх ажил зохион байгуулж, улс орны тулгамдсан асуудлуудаар салбарын байр суурийг  илэрхийлэх индэр болно.
• Гишүүдийнхээ хууль ёсны эрх ашгийг хамгаалж, нэн ялангуяа зарчмын, нийгэмд томоохон үр дагавар бий болгох асуудлуудаар стратегийн өмгөөлөл хийдэг болно гэх мэт.