Монгол дахь Япон Улсын Элчин сайдын яамны Элчин зөвлөх Кикүчи Минорү, Нэгдүгээр нарийн бичгийн дарга Мачида Хидэаки нар 2017 оны 05 дугаар сарын 22-ны өдөр Монголын Хуульчдын холбооны Ерөнхийлөгч Б.Гүнбилэг, Гадаад харилцаа, хамтын ажиллагааны хэлтсийн дарга Ж.Хунан нарыг хүлээн авч уулзлаа.

    Уулзалтын үеэр Хуульчдын холбооны Ерөнхийлөгч Б.Гүнбилэг хүлээн авч уулзаж байгаад талархаж байгаагаа илэрхийлээд 2017 оны 1 дүгээр сарын 30-ны өдөр Монгол Улсын Гадаад хэргийн яамны Консулын газраас Монголын Хуульчдын холбоо, Хууль зүй, дотоод хэргийн яам, Гадаадын иргэн, харьяатын газар, Улсын ерөнхий прокурорын газар, Монгол Улсад суугаа Дипломат төлөөлөгчийн газар болон Олон улсын шилжилт хөдөлгөөний байгууллагын төлөөлөгчийн газартай хамтран зохион байгуулсан “Виз, шилжилт хөдөлгөөний асуудлаар хуулийн зөвлөгөө өгөх үндэсний эрх зүйн орчин” сэдэвт хэлэлцүүлгийг зохион байгуулсан тухай танилцуулсан юм. Хэлэлцүүлгийн дүнд цаашид энэ чиглэлээр мэргэшсэн хуульчдыг бэлтгэх нь зүйтэй гэсэн дүгнэлтэд хүрсэн талаар дурдаад Монголын Хуульчдын холбооноос виз, шилжилт хөдөлгөөний чиглэлээр мэргэшсэн хуульч бэлтгэх ажлыг эхлүүлэхээр төлөвлөж буй тухайгаа танилцуулж, талууд энэ талаар санал солилцсон юм.

    Элчин зөвлөх Кикүчи Минорү хамтран ажиллах хүсэлтээ ирүүлсэнд талархаж байгаагаа илэрхийлээд цаашид хоёр байгууллагын хамтран ажиллах боломжийн талаар судалж үзэхээ илэрхийлэв.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС