Монголын Хуульчдын холбооны Бодлого зохицуулалтын хэлтсийн дарга А.Оюунчимэг, Мэргэжлийн хариуцлагын хорооны Ажлын албаны дарга Т.Ганбаатар нараар ахлуулсан төлөөлөгчид 2017 оны 05 дугаар сарын 18-20-ны өдрүүдэд Оросын Холбооны Улсын Буриадын Их Сургуулиас зохион байгуулсан “Ази-Номхон далайн улс орнуудын харьцуулсан эрх зүй” сэдэвт VIII удаагийн олон улсын бага хуралд амжилттай оролцлоо.

    Хурлын үйл ажиллагааны нээлтэд Бодлого зохицуулалтын хэлтсийн дарга А.Оюунчимэг үг хэлж, харьцуулсан эрх зүйн судалгааны асуудлыг хөндөж, эрдэм шинжилгээний хамтын ажиллагааг өргөжүүлэх, бидний залгамж халаа болсон ирээдүйн хуульчдын мэдлэг, чадварыг дээшлүүлэх зорилгоор зохион байгуулагдсан “Ази-Номхон далайн улс орнуудын харьцуулсан эрх зүй” сэдэвт VIII удаагийн олон улсын бага хуралд Монголын Хуульчдын холбооны нэрийн өмнөөс амжилт хүсч зохион байгуулагчдад талархал илэрхийлсэн юм.

    Хурлын хүрээнд “Оросын Холбооны Улсын нутаг дэвсгэрт Монгол Улсын иргэн, Монгол Улсын нутаг дэвсгэрт Оросын Холбооны Улсын иргэний эрх, ашиг сонирхлыг хамгаалах нь” сэдэвт дугуй ширээний уулзалт зохион байгуулагдсан ба Хуульчдын холбооны Гадаад харилцаа, хамтын ажиллагааны хэлтсийн дарга Ж.Хунан Монгол Улсын нутаг дэвсгэрт Оросын Холбооны Улсын иргэдийн эрх, ашиг сонирхлыг хамгаалахад тулгарч буй хүндрэл бэрхшээл, цаашид анхаарах асуудлаар хэлэлцүүлэг өрнүүлсэн.

    Мөн дээрх хурлын салбар хуралдаанд тус холбооны Бодлого зохицуулалтын хэлтсийн мэргэжилтэн Б.Пүрэвсүрэн нь “Шинжээчийн эрх зүйн байдалд тулгамдаж буй асуудал” сэдвээр илтгэл хэлэлцүүлэн амжилттай оролцлоо.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС