Үндсэн хуулийн цэцийн анхны дарга, гавьяат хуульч, хууль зүйн шинжлэх ухааны доктор, профессор Галдангийн Совдын нэрэмжит хууль зүйн сэдэвт шилдэг өгүүлэл шалгаруулах уралдааныг энэ оноос зохион байгуулахаар Монгол Улсын Үндсэн хуулийн цэцийн Судалгааны төв, Шүүхийн ерөнхий зөвлөлийн Шүүхийн судалгаа, мэдээлэл, сургалтын хүрээлэн, Улсын Ерөнхий Прокурорын газрын Сургалт, судалгааны төв, Хууль зүйн үндэсний хүрээлэн, Монгол Улсын Их Сургуулийн Хууль зүйн сургууль хамтран журам баталсан.

    Энэхүү өгүүллийн уралдаан нь хууль зүйн салбарын тулгамдсан асуудлыг хөндөж, шинэлэг санаа дэвшүүлсэн шилдэг өгүүллийг шалгаруулж урамшуулах, эрдэм шинжилгээ, судалгааны  ажлыг дэмжих зорилготой бөгөөд шилдэг өгүүллийг жил бүрийн 2 дугаар  сарын 1-ний өдрийн дотор шалгаруулж шагналыг 2 дугаар сарын 13-ны өдөр гардуулахаар журамласан ч энэ удаад “Монголын хуульч эрдэмтдийн үндэсний анхдугаар чуулган”-ыг зохион байгуулж буйг тохиолдуулан 2017 оны 5 дугаар сарын 10-наас 2017 оны 5 дугаар сарын 22-ны өдөр шалгаруулж, шагналыг Монголын хуульч эрдэмтдийн үндэсний анхдугаар чуулганы үеэр буюу 2017 оны 5 дугаар сарын 23-ны өдөр гардууллаа.

    Уралдаанд нийт 12 өгүүлэл ирүүлснээс зохион байгуулагчдын зүгээс тус бүр доктор эрдэмтийн багаар шалгаруулалтыг хийлгэсэн. Шалгаруулалтын дүнгээр Нийслэлийн Иргэний хэргийн давж заалдах шатны шүүхийн Ерөнхий шүүгч, хууль зүйн доктор Ж.Оюунтунгалагийн “Тээврийн хэрэгслийн ашиглалтаас үүссэн гэм хорыг арилгах эрх зүйн зохицуулалтын харьцуулсан судалгаа” сэдэвт өгүүлэл 2017 оны хууль зүйн сэдэвт шилдэг өгүүллээр шалгарав.