Монгол Улсын Худалдаа Аж Үйлдвэрийн Танхимын дэргэдэх Монгол Улсын олон улсын ба үндэсний арбитраас өнөөдөр (2017.06.08) “Шүүх ба арбитрын харилцан ажиллагаа-онол практикийн асуудлууд” сэдэвт олон улсын эрдэм шинжилгээний бага хурлыг Монгол Улсын Шүүхийн Ерөнхий Зөвлөлийн дэргэдэх Шүүхийн судалгаа, мэдээлэл, сургалтын хүрээлэн болон Монгол Улсын Эрдмийн Их Сургуультай хамтран зохион байгууллаа.

    Тус бага хуралд Австрали, Америк болон Япон Улсын эрдэмтэн, судлаачид оролцсон бөгөөд хуралд оролцогчид дор дурьдсан сэдвээр илтгэл хэлэлцүүлсэн байна. Үүнд:  

• Монголын олон улсын ба үндэсний арбитр-Эрх зүйн зохицуулалт;
• Шүүхийн олон улсын ажиллагаа ба маргаан шийдвэрлэх альтернатив арга-харьцуулалт;
• Арбитрын ажиллагаан дахь шүүхийн оролцоо;
• Монгол Улсын шүүхээр арбитрын шийдвэрийг хүлээн зөвшөөрөх, биелүүлэхэд тулгамдаж буй практик асуудлууд (тодорхой жишээн дээр);
• Улс хоорондын болон олон улсын иргэд хоорондын маргаан шийдвэрлэх арга;
• Арбитрын тухай хууль-Гомдол өргөдөл гаргах эрх;
• 2017 оны Арбитрын тухай хуулийн 29 дүгээр зүйлийг хэрэглэх нь;
• Арбитрын хэлэлцээр ба Монгол Улсын шүүхийн онцгой харъяалал;
• Орчин үеийн байгууллагын хөгжлийн чиг хандлага: Шүүх ба арбитр.

    Хурлын дүнд Монгол Улс дахь арбитрын ажиллагааг илүү сайжруулах, арбитрын ажиллагааны талаар иргэдэд үнэн зөв мэдээлэл хүргэхийн тулд боловсон хүчнийг чадваржуулахаас гадна цаашид шүүх болон арбитрын байгууллагууд хамтран зөвлөмж, тайлбар гаргах, сургалт семинар зохион байгуулах нь зүйтэй гэсэн нэгдсэн дүгнэлтэд хүрсэн байна.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС