Монголын Хуульчдын холбоо нь Олон улсын хөдөлмөрийн байгууллага, түүний харъяа Олон улсын сургалтын төвтэй хамтран “Олон Улсын хөдөлмөрийн хэм хэмжээ” сэдэвт сургалтыг 2017 оны наймдугаар сарын 21-25-ны өдрүүдэд зохион байгуулж байгаа билээ.
Сургагч багш бэлтгэх тус сургалт өнөөдөр “Хөдөлмөр эрхлэлт, ажлын байран дахь тэгш нөхцөл, боломж” үндсэн сэдвийн хүрээнд явагдсан. Тодруулбал, Зүүн болон Зүүн өмнөд Ази, Номхон далайн орнуудыг хариуцсан ОУХБ-ын Зохистой хөдөлмөр эрхлэлтийн багийн Олон Улсын Хөдөлмөрийн хэм хэмжээ болон хөдөлмөрийн эрх зүйн асуудал хариуцсан ахлах мэргэжилтэн Алайн Пильс “Хөдөлмөр эрхлэлт, ажлын байран дахь тэгш нөхцөл, боломжтой холбоотой Олон Улсын хөдөлмөрийн хэм хэмжээг шүүхэд хэрэглэх нь”, “Албадан хөдөлмөр эрхлэлт, хүүхдийн хөдөлмөр эрхлэлттэй холбоотой маргааныг шүүхийн журмаар шийдвэрлэхэд Олон Улсын хөдөлмөрийн хэм хэмжээг хэрэглэх нь” сэдвүүдээр илтгэл хэлэлцүүлж, оролцогчдыг тохиолдол дээр багаар ажиллуулсан юм.
