Монголын Хуульчдын холбоо нь Олон улсын хөдөлмөрийн байгууллага болон түүний харъяа Олон улсын сургалтын төвтэй хамтран “Олон Улсын хөдөлмөрийн хэм хэмжээ” сэдэвт сургалтыг 2017 оны 08 дугаар сарын 21-25-ны өдрүүдэд “Бага баян-Энхийн төлөө” цогцолборт амжилттай зохион байгууллаа.
Шүүгч, хуульч, сургагч багш нарын Олон улсын хөдөлмөрийн эрх зүйн талаарх мэдлэг, чадварыг дээшлүүлж дотоодын түвшинд олон улсын хөдөлмөрийн хэм хэмжээг хэрэглэх, туршлага судлах зорилготой энэхүү сургалтын сургагч багшаар Зүүн болон Зүүн өмнөд Ази, Номхон далайн орнуудыг хариуцсан ОУХБ-ын Зохистой хөдөлмөр эрхлэлтийн багийн Олон улсын хөдөлмөрийн хэм хэмжээ болон хөдөлмөрийн эрх зүйн асуудал хариуцсан ахлах мэргэжилтэн Алайн Пильс, Итали Улсын Турин хот дахь ОУХБ-ын харъяа Олон улсын сургалтын төвийн Олон улсын хөдөлмөрийн хэм хэмжээ, хөдөлмөр эрхлэлтийн эрх, хүйсийн эрх тэгш байдлыг хариуцсан сургалтын хөтөлбөрийн мэргэжилтэн Олена Вазуншка болон Гүрж Улсын ОУХБ-ын Үндэсний зөвлөх, Тбилисийн Улсын их сургуулийн Хууль зүйн сургуулийн зочин профессор, Гүрж Улсын Хуульчдын холбооны гишүүн Закари Швелидзе нар ажилласан.
Дашрамд дурдахад, тус холбооны Бодлого, зохицуулалтын хэлтсийн мэргэжилтэн Д.Монголжингоо нь энэ оны тавдугаар сард Итали Улсын Турин хот дахь ОУХБ-ын ОУ-ын сургалтын төвд суралцаж ОУХБ-ын итгэмжлэгдсэн сургагч багш болохдоо сургалтын төгсгөлд Монголын шүүгч, хуульчид, хуулийн сургуулийн багш нарт ОУ-ын хөдөлмөрийн хэм хэмжээ сэдвээр наймдугаар сард багтаан сургалт зохион байгуулахаар төлөвлөгөөгөө танилцуулж, энэхүү ажилд ОУХБ-ын Бээжин дэх салбар болон тус байгууллагын Монгол дахь хөтөлбөрийн зүгээс дэмжсэнээр ийнхүү бодит биелэлээ олж А3511079 код бүхий сургалт амжилттай зохион байгуулагдсан билээ.
Олон Улсын сертификаттай тус сургалтад оролцогчдын зүгээс сургалтын үйл ажиллагааны зохион байгуулалт, үр өгөөжийн талаар сэтгэл хангалуун байгаагаа илэрхийлсэн бөгөөд энэ удаагийн сургалтад Монголын Хуульчдын холбооны гишүүн 20 хуульч хамрагдсан юм.
Эдгээр хуульч нь ОУХБ болон ОУСТ, ОУХ-ийн хэм хэмжээтэй холбоотой мэдээлэл, кейсүүд болон тэдгээртэй холбогдох бусад мэдээллүүдээр бүрэн хангагдсаны зэрэгцээ хэрэг маргааныг шийдвэрлэхдээ энэ сургалтаас олж авсан мэдлэг, мэдээллээ ашиглах болно гэдгээ хэлж байлаа.
