Монголын Нотариатчдын танхимын төлөөлөл 2017 оны 09 дүгээр сарын 06-наас 09-ний өдрүүдэд Индонези улсын Бали арлын мужид зохион байгуулагдсан Олон Улсын Нотариатын Холбооны Азийн хэрэг эрхлэх комиссын VII чуулга уулзалт, семинарт оролцоод иржээ. Азийн хэрэг эрхлэх комиссын бүрэлдэхүүнд багтах Япон улс, БНХАУ, Монгол Улс, БНВУ, БНСУ, Индонез гэх 6 гишүүн улс орнууд тус чуулга уулзалтыг өөрийн улсад ээлжлэн зохион байгуулдаг уламжлалтай юм байна.
Харин 2017 оны чуулга уулзалтыг Индонез улс Бали арал дээр өргөн хүрээнд Индонезийн Нотариатын Нийгэмлэг амжилттай зохион байгуулж, Энэтхэг болон Тайланд улс ажиглагчаар оролцов. 263 сая гаруй хүн амтай тус улсад нийт 15000 нотариатч үйл ажиллагаа явуулдаг бөгөөд нийгэм дэх нотариатчдын ур чадвар, байр суурь болоод үүрэг оролцоо өндөр гэдгийг Индонез улс нэгэнтээ хүлээн зөвшөөрч, тэдгээрийн үйл ажиллагаа, бусад байгууллагуудын уялдаа холбоог дэмжиж ажилладаг байна.
Тиймээс “Бизнесийн таатай орчинг бүрдүүлэх” сэдвийн дор зохион байгуулсан олон улсын семинарт Индонез улсын Ерөнхийлөгч, ноён Джоко Видодо хүрэлцэн ирсэн нь нотариатчийн оролцоо, тус семинарын ач холбогдлыг илэрхийлсэн явдал байлаа. Тэрбээр хувийн өмчийг хамгаалах, улс орны эдийн засгийн тогтвортой байдал, гадаадын хөрөнгө оруулалтын аюулгүй байдлыг хангаж, түүний өсөлтийг дэмжихэд нотариатчийн үүрэг нэн чухал болохыг онцлохын зэрэгцээ төрийн үйл ажиллагааг түргэн шуурхай, боловсронгуй түвшинд хүргэхийн тулд нотариатын үйл ажиллагааг орчин үед нийцсэн шинэ хэлбэрт оруулж, зайлшгүй цахимжуулах шаардлагатай гэдгийг тэмдэглэсэн юм. Цаашлаад Ерөнхийлөгч Джоко Видодо Дэлхийн банкнаас гаргадаг “Doing Business“ индексээр Индонез улс 2017 оны байдлаар дэлхийд 91 дүгээр байранд жагсдаг бол ойрын жилүүдэд эхний 40 дүгээр байранд орох зорилгыг тавьж ажиллахаа мэдэгдсэн болно.
Азийн хэрэг эрхлэх комиссын VII чуулга уулзалт, семинарын үеэр Индонезийн Нотариатын Байгууллага өөрийн улсыг сурталчилж, хөрөнгө оруулалтын орчинг сайжруулах тухай саналаа солилцохоос гадна эдийн засаг, нийгэм, улс төр, хуулийн чиглэлээр ажиллаж буй мэргэжилтэн, судлаач, багш эрдэмтэд зэрэг өргөн хүрээний төлөөлөгчдийг хамруулснаараа нотариатчдын үйл ажиллагаа шинжлэх ухааны түвшинд очсоныг мөн адил илтгэснээрээ үр дүнтэй болж чадлаа.
Тус чуулга уулзалт, семинарт Монголын Нотариатчдын танхимын Ерөнхийлөгч Р. Онончимэг, бусад төлөөлөгчдийн хамт оролцлоо.
Дэлгэрэнгүй мэдээллийг ОУНХ-ны Азийн Хэрэг Эрхлэх Комиссын VII чуулга уулзалтын албан ёсны веб хуудаснаас авна уу: http://www.ini-seminar-bali.id/2017/
Индонез улсын Ерөнхийлөгч, ноён Джоко Видодо тус семинарт оролцсон тухай нийтлэлийг дараах холбоосоор харна уу.http://www.balidiscovery.com/messages/message.asp?Id=17178
