Жил бүрийн аравдугаар сарын эхний долоо хоногт Олон улсын сэтгүүл зүйн ёс зүйн өдрүүд тохиодог. Манай орны хувьд Хэвлэл мэдээллийн зөвлөлөөс анх удаа Сэтгүүл зүйн ёс зүйн форумыг өчигдөр /2017.10.03/ зохион байгууллаа.

    Тус форумаар хэвлэл мэдээллийн салбарынхаа хараат бус байдал, хэвлэн нийтлэх эрх чөлөө, редакцын бодлого, ёс зүйн алдаа зэрэг сэдвийн хүрээнд санал бодлоо илэрхийлж, шийдвэрлэх арга замын талаар ярилцсан. Форумд хэвлэл мэдээллийн байгууллагын удирдлага, судлаач, сэтгүүлчид, олон улсын байгууллагын төлөөлөгчид болон Монголын Хуульчдын холбооны төлөөлөл оролцсон бөгөөд тус холбооны Ёс зүйн хорооны гишүүн Л.Галбаатар Эрүүгийн хууль, Зөрчлийн тухай хууль дахь хэвлэл мэдээллийн зохицуулалтын талаар илтгэл хэлэлцүүлж, мэдээлэл өгсөн юм.

    Сонирхуулахад, Монголын Хэвлэл мэдээллийн зөвлөл байгуулагдаад гурван жил болж байгаа бөгөөд энэ хугацаанд 40 орчим иргэн, аж ахуй нэгжээс ирсэн 100 гаруй гомдол хүлээн авч, шийдвэрлэжээ.