Бүгд Найрамдах Франц Улсын  Хуульчдын холбоодын Үндэсний Зөвлөлөөс 2017 оны аравдугаар сарын 18-21-ний өдрүүдэд тус улсын Бордо хотод “Цахим эдийн засаг ба өмгөөлөгчдийн орон зай” сэдэвт олон улсын хурлыг зохион байгуулсан бөгөөд Монголын Хуульчдын холбоог төлөөлөн Эдийн засгийн эрх зүйн хорооны тэргүүн Л.Түвшинцэнгэл амжилттай оролцоод ирлээ.

    Хуралд оролцогчид 2030 он гэхэд цахим эдийн засгийн шинэ хандлагад өмгөөлөгчдийн стратеги ямар байх төлөвийн талаар санал солилцсон бөгөөд хурлын үеэр 80 гаруй сэдвийн хүрээнд салбар хуралдаан зохион байгуулсан байна.

    Тухайлбал, үйлчлүүлэгчид цахим орчноор дамжуулан хууль зүйн зөвлөгөө, үйлчилгээ авах хандлага өсөн нэмэгдэхийн хэрээр цаашид шүүх хурлын танхимд шүүгчийн өмнө өмгөөлөгч зогсохоос илүүтэй өмгөөлөгчийн үүргийг цахим хэлбэрээр робот гүйцэтгэхэд хүрвэл шүүх, шүүгч, өмгөөлөгчийн ажлын байр хэр удаан хадгалагдах вэ? гэх асуудлыг дэвшүүлж хэлэлцсэн бол өмгөөлөгчид хүний эрх, эрх чөлөөг өмгөөлөхийн тулд маш их эрсдэлийг өөртөө авч байж ялалт байгуулж, бусдыг хамгаалдаг атал өмгөөлөгчдийг хэн өмгөөлөн хамгаалах асуудал хурцаар хөндөгдөж, аюултай нөхцөлд ажлаа үүргээ гүйцэтгэж яваа дэлхийн улс орнуудын өмгөөлөгчдийн тухай ярилцсаны дүнд Хүний эрхийн төлөөх шагналыг Туркийн Өмгөөлөгчдийн Холбоонд гардуулсан байна.

    Мөн хурлын үеэр амжилттай зохион байгуулагдсан хуульчийн өмсгөлийн Олон улсын үзэсгэлэнд Монгол Улсын шүүгчийн өмсгөл амжилттай оролцлоо.

ГАДААД ХАРИЛЦАА, ХАМТЫН АЖИЛЛАГААНЫ ХЭЛТЭС