Монгол Улсын Хүний эрхийн үндэсний комиссын дарга Ж.Бямбадорж, гишүүн П.Оюунчимэг, Ажлын албаны дарга Ч.Алтангэрэл нар Монголын Хуульчдын холбооны ерөнхийлөгч Ж.Хунанг 2017 оны арвандүгээр сарын 13-ны өдөр хүлээн авч уулзлаа. 
    Уулзалтаар Хүний эрхийн үндэсний комисс нь Монголын Хуульчдын холбоотой хамтран ажиллаж ирсэн, цаашид ч хамтын ажиллагаагаа өргөжүүлэн үргэлжлүүлэх сонирхолтой байгаагаа уламжилсан. Түүнчлэн хүний эрхийн боловсрол олгох, хуульчдад болон эрх зүйч мэргэжилтэн бэлтгэдэг их, дээд сургуулиудад хүний эрхийн хичээлийг албан ёсоор үндсэн судлах сэдэв болгон оруулсан, шүүгчдэд сургалт явуулах, өмнө нь явуулж ирсэн 8 багц цагийн сургалтыг үргэлжлүүлэх, хүний эрхийн сургалтын 24 төрлийн гарын авлагыг магадлан итгэмжлэлд оруулах зэрэг асуудлыг хөндөн ярилцлаа.

    Монголын Хуульчдын холбоо нь 5500 гаруй гишүүнтэй бөгөөд Хүний эрхийн үндэсний комисстой хамтран ажиллах тусгай төлөвлөгөө гарган, хамтарсан баг ажиллуулж, хүний эрхийн сургалт зохион байгуулах, бусад чиглэлээр хамтрах саналтай байгаагаа хэлсэн. Ингээд талууд юуны түрүүнд "Хуульчийн мэргэжлийн ёс зүй, хүний эрхэд суурилсан хандлага" сэдвээр сургалт  явуулах, хүний эрхийн цахим сургалтыг илүү боловсронгуй арга хэлбэрт шилжүүлэн ашиглах, цаашдаа бусад чиглэлээр хамтран ажиллахаар боллоо.