Монголын Хуульчдын холбооны Эвлэрүүлэн Зуучлалыг дэмжих асуудал эрхэлсэн хороо, Монгол-Японы хуульч, эвлэрүүлэн зуучлагчдын холбоо, Шүүхийн ерөнхий зөвлөлийн дэргэдэх Эвлэрүүлэн зуучлагчдын зөвлөл хамтран “Эвлэрүүлэн зуучлах ажиллагааны орчин үеийн чиг хандлага” сэдэвт эрдэм шинжилгээний шилдэг илтгэлийн уралдааныг хууль зүйн их, дээд сургуулийн оюутнуудын дунд дөрөв дэх жилдээ зохион байгууллаа.
Энэхүү уралдааныг эвлэрүүлэн зуучлалын судалгаа, шинжилгээний ажлыг дэмжих, Монголын эвлэрүүлэн зуучлалын тогтолцооны цаашдын хөгжилд түлхэц үзүүлэх, тулгамдаж буй асуудлыг шийдвэрлэх арга замыг тодорхойлох зорилготойгоор зохион байгуулсан бөгөөд нийт 22 оюунтан илтгэл ирүүлсэн.
Үүнээс хоёрдугаар шатанд шалгарсан зургаан илтгэлийг өнгөрсөн баасан гаригт Шүүхийн ерөнхий зөвлөлийн байранд хэлэлцүүлж, шилдэг илтгэлийг тодрууллаа. Илтгэлийн уралдааны нэгдүгээр байрт, МУИС-ХЗС-ийн Олон Улсын эрх зүйн 5 дугаар курсын оюутан М.Сэндэнхандын “Эвлэрүүлэн зуучлах ажиллагааны хөгжлийн орчин үеийн чиг хандлага:Гэр бүлийн маргаан дахь “шаардлагатай тохиолдолд” эвлэрүүлэн зуучлалыг дахин явуулахын үр дагавар, түүнд шаардагдах эвлэрүүлэн зуучлагчдын ур чадвар” сэдэвт илтгэл, хоёрдугаар байрт, МУИС-ХЗС, Японы эрх зүйн 4 дүгээр курсын оюутан О.Должинсүрэн, Э.Санчир-Уяа нарын “Эвлэрүүлэн зуучлах ажиллагааны хөгжлийн орчин үеийн чиг хандлага:Нийтийн эрх ашигт учирсан хохирол, түүнээс үүдэх гэм хорын асуудлыг эвлэрүүлэн зуучлах ажиллагааны журмаар шийдвэрлэх” сэдэвт илтгэл, гуравдугаар байрт “Их Засаг” Олон Улсын их сургуулийн Хууль зүйн сургуулийн 207 дугаар бүлгийн оюутан Б.Лхагвасүрэнгийн “Эвлэрүүлэн зуучлах ажиллагааны хөгжлийн орчин үеийн чиг хандлага” сэдэвт илтгэл тус тус шалгарлаа.
