Монголын Хуульчдын холбооны Хуульчдын эрх, хууль ёсны ашиг сонирхлыг хамгаалах асуудал эрхэлсэн хорооноос уламжлал болгон зохион байгуулдаг “Шилжин явах цом”-ын төлөөх боулингийн тэмцээн 2017 оны 05 дугаар 06-нд Үндэсний соёл амралтын хүрээлэнгийн “Sport Pub Bowling” төвд амжилттай болж өндөрлөлөө.

    Тэмцээнд Монголын Хуульчдын холбооны Тамгын газар, тус холбооны Иргэний эрх зүйн хороо, Прокурорын хороо,  Өмгөөлөгчдийн хороо болон Монголын Өмгөөлөгчдийн холбоо, Өмгөөллийн “Соёмбо легал партнерс”, “Адвокат консалтинг”, “Монгол элч”, “И Эл Си” “Улаанбаатар Адвокат” нөхөрлөлийн нийт 12 багийн тамирчид өрсөлдсөн.

    Хуульчдын холбооны гишүүн хуульчдын амралт, чөлөөт цагийг зөв боловсон өнгөрүүлэх, Холбооны гишүүдийн хамтын ажиллагаанд дэмжлэг үзүүлэх зорилготой тус тэмцээний тэргүүн байрт Монголын Хуульчдын холбооны Тамгын газрын баг, дэд байрт Өмгөөллийн “Адвокат консалтинг” ХХН, гуравдугаар байрт Өмгөөлөгчдийн хорооны баг тус тус шалгарлаа. Мөн шилдэг эрэгтэй тоглогчоор Монголын Хуульчдын холбооны Тамгын газрын багийн тоглогч Х.Наранхүү,  шилдэг эмэгтэй тоглогчоор Иргэний эрх зүйн хорооны багийн тоглогч, өмгөөлөгч С.Цацралтуяа нар шалгарсан юм.