Хүйсийн тэгш эрхийн төв, Монголын Хуульчдын холбоо, Хэвлэлийн хүрээлэн хамтран "Хохирогч төвтэй-хэвлэл мэдээлэл-өмгөөлөл" сэдэвт сургалтыг 2018 оны нэгдүгээр 18-19-ний өдрүүдэд "Энхийн төлөө цогцолбор"-т зохион байгуулж байна.
Сургалтын нээлт өнөөдөр болсон бөгөөд нээлтэд Хуульчдын холбооны Ерөнхийлөгч Ж.Хунан, Хүйсийн тэгш эрхийн төвийн тэргүүн Г.Ганбаясгах, Хэвлэлийн хүрээлэнгийн багш Д.Мөнхчимэг нар оролцлоо.
Хүний эрх, эрх чөлөө, хүний эрхэд суурилсан хандлагыг бий болгох, жендэрт суурилсан хүчирхийлэлтэй тэмцэх, түүнчлэн охид, эмэгтэйчүүдийн бэлгийн болон нөхөн үржихүйн эрхийн чиглэлээр мэдээлэл өгөх зорилготой тус сургалтаар 40 эмэгтэй өмгөөлөгч, сэтгүүлчийг мэргэшүүлэн бэлтгэж буй юм.
Сургалтад хамрагдаж буй эдгээр өмгөөлөгч, сэтгүүлч нь жендэрт суурилсан хүчирхийллийн гэмт хэргийг мэдээлэх, өмгөөлөх явцдаа анхаарах ёс зүйн зарчмуудын талаар мэдлэг, чадвар эзэмших бөгөөд гэмт хэргээс урьдчилан сэргийлэх үйл ажиллагааг явуулах, мэдээ мэдээлэл бэлтгэхдээ харилцан туршлага солилцох, хамтран ажиллах боломж нээгдэж байна.
