Монголын Хуульчдын холбооноос “Хуульчийн эрх зүйн байдлын тухай хуулийн хэрэгжилтийн өнөөгийн байдал, хуульд нэмэлт, өөрчлөлт оруулах асуудал” сэдэвт хэлэлцүүлгийг 2017 оны нэгдүгээр сарын 19-нд “Хуульчдын танхим”-д зохион байгууллаа.
Хэлэлцүүлэгт Хуульчдын холбооны Ерөнхийлөгч Ж.Хунан, Тамгын газрын дарга Ц.Ганболд болон тус холбооны бүтцийн байгууллага болох Зөвлөл, Чиг үүргийн хороо, Сайн дурын хороодын удирдлагууд болон гишүүдийн төлөөлөл оролцлоо.
Хэлэлцүүлгийн хүрээнд Хуульчдын холбооны Магадлан итгэмжлэх асуудал эрхэлсэн хорооны дарга О.Мөнхсайхан “2012 онд батлагдсан Хуульчийн эрх зүйн байдлын тухай хуулийн үзэл баримтлал” сэдвээр, Тамгын газрын дарга Ц.Ганболд “Хуульчдын холбооны хороодын үйл ажиллагаа” сэдвээр, тус холбооны мэргэжилтэн, судлаач Д.Монголжингоо ”Хуульчийн эрх зүйн байдлын тухай хуулийн хэрэгжилтийн үнэлгээ” сэдвээр, Хуульчийн нийтэд тустай мэргэжлийн үйл ажиллагаа эрхэлсэн хорооны Удирдах зөвлөлийн гишүүн, судлаач Л.Галбаатар “Хуульчийн чиг үүргийн тухай НҮБ-ын үндсэн зарчмууд ба Хуульчийн эрх зүйн байдлын тухай хууль” сэдвээр, Хуульчийн мэргэжлийн дүрэм, ёс зүйн асуудал эрхэлсэн хорооны гишүүн Н.Баасанжав “Хуульчийн ёс зүй” сэдвээр тус тус танилцуулга хийж, хэлэлцүүлсэн.
Хэлэлцүүлэгт оролцогчдын зүгээс Хуульчийн эрх зүйн байдлын тухай хуулийг боловсронгуй болгох, сайжруулах чиглэлээр олон санал гаргасан бөгөөд санал, зөвлөмжийг Хууль зүй, дотоод хэргийн яаманд хүргүүлэхээр боллоо.
