Монголын Хуульчдын холбоо нь Олон улсын хөдөлмөрийн байгууллага болон түүний харьяа Олон улсын сургалтын төвтэй хамтран  “Олон Улсын хөдөлмөрийн хэм хэмжээ” сэдэвт сургалтыг 2017 оны 08 дугаар сарын 21-25-ны өдрүүдэд зохион байгуулсан билээ.

    Шүүгч, хуульч, сургагч багш нарын Олон улсын хөдөлмөрийн эрх зүйн талаарх мэдлэг, чадварыг дээшлүүлж дотоодын түвшинд олон улсын хөдөлмөрийн хэм хэмжээг хэрэглэх, туршлага судлах зорилготой А3511079 код бүхий сургалтын үр дүнгийн талаар мониторинг хийхээр ОУХБ-ын хөндлөнгийн үнэлгээчин Брита Мэдсэн манай улсад хүрэлцэн ирж тус сургалтад хамрагдсан хуульчдын төлөөлөлтэй уулзаж ярилцлаа.

    Уулзалтад сургалтад хамрагдаж сертификат авсан хуульч Б.Мандалбаяр, Г.Эрдэнэбилэг, Ж.Нямбаяр нар хүрэлцэн ирж сургалтын ач холбогдол, үр өгөөжийн талаар ярьсан. Мөн хуульч Г.Эрдэнэбилэг, Ж.Нямбаяр нар өөрсдөө санаачилан шинээр хийх гэж байгаа ажлынхаа талаар танилцуулсан бөгөөд хуульчид төлөвлөсөн ажлаа өөрсдийн санаачилгаар нэгдэж байгуулсан Иргэний эрх зүйн хорооны дэргэдэх Хөдөлмөрийн эрх зүйн дэд хороотой хамтран хэрэгжүүлэхээр төлөвлөж байгаа юм.

    Энэхүү уулзалтын төгсгөлд Монголын Хуульчдын холбоо нь хуульчдад зориулсан сургалтын асуудлаар ОУХБ-тай  цаашид хамтран ажиллах хүсэлтэй байгаагаа илэрхийлсэн билээ.