Монголын Хуульчдын холбооны Захиргааны эрх зүйн хороо нь “Зөрчлийн тухай хууль болон татварын хууль тогтоомжийн уялдаа, хэрэглээ” сэдэвт хэлэлцүүлгийг 2018 оны хоёрдугаар сарын 23-нд зохион байгууллаа.

    Шинээр мөрдөгдөж буй Зөрчлийн тухай хууль, Зөрчил шалган шийдвэрлэх тухай хууль нь Татварын ерөнхий хууль болон татварын бусад хууль тогтоомжтой хэрхэн уялдаж байгаа, тус хуулиудын практик хэрэглээ, тулгарч буй бэрхшээлийн талаар холбогдох нийтийн захиргааны байгууллага, шүүх, прокурорын байгууллагын төлөөлөл, хувийн компанийн хуульч, Захиргааны эрх зүйн хорооны гишүүд, бусад сонирхогч этгээдүүдийг оролцуулан тэдний дуу хоолой, байр суурийг сонсох зорилготойгоор энэхүү хэлэлцүүлгийг зохион байгуулсан бөгөөд 150 гаруй хуульч оролцсон.

    Хэлэлцүүлгийг Захиргааны эрх зүйн хорооны тэргүүн, хууль зүйн доктор Ц.Цогт нээж үг хэлсэн бол “Татварын маргаан шийдвэрлэх ажиллагаа ба хуулийн коллиз” сэдвээр хуулийн зөвлөх Д.Амарбаясгалан, “Татвар төлөгч татвар төлөхөөс зайлсхийх зорилгоор татварын хууль тогтоомж зөрчих үйлдэл: Зөрчлийн тухай хуулийн 11.19.1” сэдвээр МУИС-ийн Хууль зүйн сургуулийн Нийтийн эрх зүйн тэнхимийн багш О.Чулуунцэцэг, “Татварын албанаас Зөрчлийн тухай хуулийг хэрэгжүүлж буй байдал, тулгарч буй бэрхшээл” сэдвээр  ТЕГ-ын хуулийн хэрэгжилтийг хангах газрын татварын улсын байцаагч, Нийслэлийн татварын газрын дэргэдэх маргаан таслах зөвлөлийн гишүүн Б.Баттогтох, “Нийслэл дэх Захиргааны хэргийн анхан шатны шүүхэд татварын албатай холбоотой зөрчлийн хэрэг хянан шийдвэрлэж байгаа байдал” сэдвээр Нийслэл дэх Захиргааны хэргийн анхан шатны шүүхийн шүүгч Г.Мөнхтулга нар илтгэл хэлэлцүүлж, мэдээлэл солилцлоо.  

    Тус хэлэлцүүлгийг Хуульчдын холбооны "Монголын Хуульчдын холбоо /Mongolian Bar Association/" фэйсбүүк хуудсаар шууд дамжуулав. ЭНД дарж үзнэ үү.