Монголын Хуульчдын холбооны Тамгын газрын дэд дарга Ш.Жолбарсаар ахлуулсан ажлын хэсэг 2018 оны гуравдугаар сарын 26, 27-ны өдрүүдэд Дорнод аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, шинээр батлагдсан хууль тогтоомжийг сурталчлах, хуульчийн үргэлжилсэн сургалт зохион байгуулах зорилготойгоор орон нутагт ажиллаж байгаа бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалтыг зохион байгуулж буй юм. Тодруулбал, Хуульчдын холбооны Захиргааны эрх зүйн хорооны удирдах зөвлөлийн гишүүн Н.Мягмар “Төрийн албаны тухай хуулийн шинэчилсэн найруулга” сэдвээр, Захиргааны хэргийн давж заалдах шатны шүүхийн шүүгч С.Мөнхжаргал “Захиргааны хэрэг хянан шийдвэрлэх ажиллагаа” сэдвээр, “Хан голомт” төвийн захирал, хуульч Ц.Азбаяр “Хуульчийн харилцаа, хандлага” сэдвээр  тус тус хичээл заасан бөгөөд сургалтад Дорнод аймагт хуульчийн мэргэжлийн үйл ажиллагаа явуулж буй 40 орчим хуульч хамрагдсан. 

   Хуульчдын холбоо нь хуульчийн нийтэд тустай мэргэжлийн үйл ажиллагаа эрхлэх, төлбөрийн чадваргүй иргэнд хууль зүйн туслалцаа үзүүлэх чиг үүргийнхээ хүрээнд Дорнод аймгийн иргэдэд хууль зүйн үнэ төлбөргүй зөвлөгөө өгөх ажлыг зохион байгуулж, өдөрлөгт 20 орчим иргэн оролцож зөвлөгөө авлаа.

    Түүнчлэн Хуульчдын холбооны Ерөнхийлөгчийн тушаалаар хууль зүйн салбарын хөгжилд оруулсан хувь нэмрийг нь үнэлэн Хуульчдын холбооны гишүүн, Дорнод аймгийн прокурор Т.Ууганбаатар, Сум дундын Иргэний хэргийн анхан шатны шүүхийн шүүгч Ш.Алтанцэцэг, Т.Байгалмаа нарыг  “Хүндэт тэмдэг”-ээр шагнасныг гардуулан өгсөн юм.

    Мөн ажлын хэсэг нь Дорнод аймгийн салбарын зохицуулагч, өмгөөлөгч А.Мэндсайханд Хуульчдын холбооны тугийг гардууллаа.