Монголын Хуульчдын холбооны Сургалтын хороо, Хууль зүйн туслалцааны төв хамтран 2018 оны 04 дүгээр сарын 09, 10-ны өдрүүдэд улсын өмгөөлөгч нарт хуульчийн үргэлжилсэн сургалт зохион байгууллаа.

    Сургалтаар хууль зүйн ухааны доктор Б.Гүнбилэг “Үндсэн хуулийн эрх зүй” сэдвээр, УЕПГ-ын Сургалт, судалгааны төвийн Гэмт хэргийн шалтгаан нөхцөлийг судлах хүрээлэнгийн захирал, доктор Б.Өнөрмаа “Хүүхдийн халдашгүй байдлын эсрэг гэмт хэрэгт өмгөөлөгчийн оролцоо” сэдвээр, “Хан Голомт” консалтингийн захирал, хуульч Ц.Азбаяр “Хуульчийн хөгжил, харилцаа, хандлага” сэдвээр, ХСИС-ийн багш Н.Мөнхзул “Зөрчлийн тухай хууль” сэдвээр, хуульч, судлаач Б.Эрдэнэбилэг “Эрүүгийн хэрэг хянан шийдвэрлэх тухай хууль” сэдвээр тус тус хичээл заасан. Хуульчийн үргэлжилсэн сургалтын гурван багц цаг олгосон тус сургалтад 21 аймаг, Улаанбаатар хотын нийт 53 улсын өмгөөлөгч хамрагдсан юм. 

    Мөн Монголын Хуульчдын холбооны Сургалтын хороо, Хууль зүйн туслалцааны төв хамтран 2018 оны 04 дүгээр сарын 11-ний өдөр “Төрөөс хууль зүйн туслалцаа үзүүлэх үндэсний тогтолцоог бэхжүүлэх нь” сэдэвт хэлэлцүүлэг зохион байгуулсан бөгөөд тус хэлэлцүүлэгт Монголын Хуульчдын холбооны Ерөнхийлөгч Ж.Хунан “Төрөөс үзүүлж байгаа хууль зүйн туслалцааны Үндэсний тогтолцоог бэхжүүлэх нь” сэдвээр илтгэл хэлэлцүүлсэн.

    Хэлэлцүүлгээр төрөөс үзүүлж буй хууль зүйн туслалцааны тогтолцоог бэхжүүлэх, боловсронгуй болгох, үйлчлүүлэгчдийн хүрээг нэмэх, улсын өмгөөлөгч нарын нийгэм болон эдийн засгийн баталгааг сайжруулахад анхаарах зэрэг чухал асуудлыг хөндсөн юм.