Монголын Хуульчдын холбоо нь хуульчдын чадавхыг бэхжүүлэх, тэдний нийгмийн хариуцлагыг нэмэгдүүлэх зорилгоор Нээлттэй нийгэм форумтай хамтран ажиллахаар боллоо. Хамтын ажиллагааны санамж бичиг үзэглэх ёслолын ажиллагаа өнөөдөр /2018.04.18/ болж, Монголын Хуульчдын холбооны Ерөнхийлөгч Ж.Хунан, Нээлттэй нийгэм форумын захирал П.Эрдэнэжаргал нар гарын үсэг зурж баталгаажууллаа. Тус ёслолд Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхэлсэн хорооны тэргүүн Л.Энхсайхан, Гадаад харилцаа, хамтын ажиллагаа хариуцсан мэргэжилтэн Ц.Жаргалан, Нээлттэй нийгэм форумын Засаглалын хөтөлбөрийн менежер П.Бадамрагчаа, Б.Хишигсайхан нар оролцсон.

    Талууд нь эрх зүйн шинэтгэлийн асуудлаар хэлэлцүүлэг өрнүүлэх, бодлогын шийдэл санал болгох, хамтарсан нөлөөллийн үйл ажиллагаа зохион байгуулахаар тохиролцсон юм. Тухайлбал, Нээлттэй нийгэм форум нь Монголын Хуульчдын холбооноос жил бүр зохион байгуулдаг “Хуульчдын форум”-ын үеэр “Шүүхийн шинэтгэлийг гүнзгийрүүлэх нь” “Эрүүгийн хууль тогтоомжийн хэрэгжилт, тулгамдаж буй асуудал”, “Гэмт хэргээс урьдчилан сэргийлэх нь” зэрэг сэдвээр салбар хуралдаан зохион байгуулахад техникийн болон санхүүгийн дэмжлэг, туслалцаа үзүүлэхээр боллоо.

     Мөн шүүхийн шинэтгэлийн индекс боловсруулан, судалгаа хийх, иргэдийн эрх зүйн чадавх, боловсролыг дээшлүүлэх, хуульчийн нийтэд тустай үйл ажиллагааг хөхиүлэн дэмжих, хуульчдын чадавхыг сайжруулах зэрэг чиглэлээр хамтран ажиллах юм. Тодруулбал, хуульчдын про-боно үйл ажиллагааг хөгжүүлэн дэлгэрүүлэх, сурталчлах ажлын хүрээнд хамтарсан хэлэлцүүлэг зохион байгуулах,  Азийн про-боно хуульчдын чуулга уулзалтад Монголын хуульчдын төлөөллийг оролцуулах ажлыг хамтран зохион байгуулахаар тохиролцлоо.