Монголын Хуульчдын холбооны Тамгын газрын дарга Ц.Ганболдоор ахлуулсан ажлын хэсэг 2018 оны дөрөвдүгээр сарын 18, 19-ний өдрүүдэд Сэлэнгэ аймагт ажиллалаа.

    Ажлын хэсэг нь Монголын Хуульчдын холбооны үйл ажиллагааг таниулах, шинээр батлагдсан хууль тогтоомжийг сурталчлах, хуульчийн үргэлжилсэн сургалт зохион байгуулах зорилготойгоор орон нутагт ажилласан бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт явуулж байна. Тодруулбал, Хуульчдын холбооны гишүүн хуульч Ц.Азбаяр “Хуульчийн хөгжил”, “Хуульчийн харилцаа, хандлага” сэдвээр, Монголын Хуульчдын холбооны гишүүн, хуульч, судлаач Б.Эрдэнэбилэг “Эрүүгийн хэрэг хянан шийдвэрлэх тухай хуулийн үзэл баримтлал” сэдвээр, Хуульчдын холбооны гишүүн хуульч Б.Өнөмөнх “Гадаадын иргэний эрх зүйн байдал болон тулгамдаж буй асуудал” сэдвээр тус тус хичээл заасан бөгөөд сургалтад Сэлэнгэ аймагт хуульчийн мэргэжлийн үйл ажиллагаа явуулж буй 40 гаруй хуульч хамрагдсан юм. Мөн ажлын хэсэг нь Сэлэнгэ аймгийн хуульчдын дунд Хуульчийн эрх зүйн байдлын тухай хуулийн шинэчилсэн найруулгын төслийн хэлэлцүүлэг зохион байгуулсан. Тус хэлэлцүүлгийг Хуульчдын холбооны Тамгын газрын дарга Ц.Ганболд удирдан явуулсан бөгөөд хуульчид олон үнэтэй санал уламжиллаа.

        Хуульчдын холбоо нь хуульчийн нийтэд тустай мэргэжлийн үйл ажиллагаа эрхлэх, төлбөрийн чадваргүй иргэнд хууль зүйн туслалцаа үзүүлэх чиг үүргийнхээ хүрээнд Сэлэнгэ аймгийн иргэдэд хууль зүйн үнэ төлбөргүй зөвлөгөө өгөх ажлыг зохион байгуулсан. Түүнчлэн Хуульчдын холбооны Ерөнхийлөгчийн тушаалаар Сум дундын иргэний хэргийн анхан шатны шүүхийн шүүгч Л.Соёлмаа, Сэлэнгэ аймгийн прокурорын орлогч Б.Энхтулга, Хуульчдын холбооны Сэлэнгэ аймаг дахь салбарын зохицуулагч Р.Атарцэцэг нарыг  “Хүндэт тэмдэг”-ээр шагнасныг гардуулан өгсөн.

    Сэлэнгэ аймаг дахь салбарын зохицуулагч, өмгөөлөгч Р.Атарцэцэгт Монголын Хуульчдын холбооны тугийг гардууллаа.